Margarita Maria Lopez de Maturana dohatsuaren museoa inaugurauko dabe Berrizen

| Ikusi handiago | Argazki originala

Margarita Maria Lopez de Maturana dohatsuri buruzko museoa edegiko dabe arrastian Berrizen, Mesedetako komentuan. Museoa ezagutzeko bisita gidatua egingo dabe, eta ostean, Mario Iceta Bilboko gotzainak mezea emongo dau.

Berrizko Mesedeetako Misiolarien sortzailea Bilbon jaio zan Pilar izenagaz, 1884ko garagarrilaren 25ean, eta Donostian hil, 1934ko garagarrilaren 23an. Klausurako komentua zana misionarien institutu bihurtu eban. Gaur egun 17 herrialdetan dabilz beharrean. Besteak beste, espedizinoak bialdu zituan Txina eta Japoniara 1920ko hamarkadan. 2006an dohatsu izentau eben.

Komentuak material ugari dauka, tartean Margarita Mariak berak misinoetara idatzitako gutunak. Argazkiak, aldizkariak, pelikulak, liburuak eta misinoetatik ekarritako objektuak be ikusgai dagoz museoan.

Margarita Maria Museoa. Berriztik Mundura espazioa barriztatzeko hiru erespide nagusi izan ditue, bata Margarita Mariaren irudia gogoratu eta nabarmentzea. Misinoetako lana gizonen kontua zan sasoian, emakume honek ebanjelizazinotik harago egoan jarduerea proposau eban, personearen duintasuna bultzatzea, batez be emakumearena, azaldu dabe museoko arduradunek.

Berrizko Mesedeetako Misiolariek urteotan egindako lana ezagutzeko aukerea be eskaintzen dau museoak, izan be sortu zanetik gaur egunera arteko jarduerea ikusiko dogu bertan.

Bisita gidatua 16:30ean hasiko da, eta mezea, 18.00etan. Amaieran, kopaua eskainiako dabe.