'Harako Gabriel Aresti hartaz' bilbotar olerkariari buruzko zikloa Bilboko Kafe Antzokian

| Ikusi handiago | Argazki originala

Gabriel Aresti bilbotar olerkari unibersala 1975ean hil zan, sorkuntza lan itzela egina eukalarik eta, hain gazterik hil ez balitz, are lan handiagoa egiteko aukerea izango eban, hain zuzen. Guztiagaz be, haren obra orduko euskaldunen bihotzetan sakon sartu zan, eta belaunaldi gazteek laster kantu bihurtu zituen haren olerkiak, alde batetik, bikain batzen zituelako euren kezka eta arazoak eta, bestetik, auspo ederra emoten eutseelako euren nahi eta amesei.

Handik hiru urtera, Bilboko euskaltegi sortu barri batek olerkariaren izena mailegutan hartu eta, harek bezela, euskerearen ahotsak eta oihartzunak lau haizetara zabaltzeari ekin eutson. Izan be, Gabriel Aresti euskaltegiko sortzaileek argi-argi eukien, euren proiektua, Gabriel bera lez, bilbotarra, euskalduna eta aurrerazalea izan behar zala, horixe izanik olerkariari omen egiteko modurik onena. Ordutik bide hori jorratzen jardun dau Gabriel Aresti euskaltegiak, izena mailegatu eutson idazlearen itzalari gorazarre egin guran.

Eta orain, hemendik egun batzuetara –urriaren 14an, hain zuzen–, Gabriel Arestiren jaiotzearen 79. urteurrena izango dogula-eta, Gabriel Aresti euskaltegiak ekitaldiz beteriko ziklo oparo ba tantolatu dau, data horren atxakian, barriro be gogoan eta kontuan hartu daiguzan Gabriel Arestik esandakoak eta egindakoak.

Kontuak kontu, ondokoak dira Gabriel Aresti euskaltegiak Harako Gabriel Aresti hartaz izenburupean prestau dituan ekitaldiak, banan-banan eta egunez egun azaldurik:

• Urriak 8, astelehena, 11:30ean eta 19:00retan. Berbaldi didaktikoa: Arestiri gorazarre. Hizlaria: Xabier Monasterio.

• Urriak 9, martitzena, 11:30ean eta 19:00retan. Kantagintza: Gabriel Arestiren kantuen gainean. Anje Duhalde, Josu Zabala eta Rafa Rueda

• Urriak 10, eguaztena, 11:30ean eta 19:00retan. ZineTxokoa: Diot. Gabriel Aresti. Abra Produkzino Etxearen dokumentala

• Urriak 11, eguena, 17:00etan. Irratsaioa: Arestiren garaia kantuz. Bilbo Hiria irratiko Pedro Elias Igartua.

• Urriak 13, zapatua, 12:00etan. Txango kulturala: Arestiren Bilbo. Edorta Jimenez.

• Urriaren 8tik 14ra bitartean. Bizitzaren erakusgarri erakusketea.