Bilboko Zirkuituak eguenean ekingo deutso auzoetan antolatzen dauen antzerki denporaldiari

| Ikusi handiago | Argazki originala

Bilboko Udaleko Kultura eta Hezkuntza Sailak antolatu dauen Bilboko Zirkuitua programeak udagoieneko denporaldiari eguenean, hilak 4, emongo deutso hasierea, bederatzi antzerki ikuskizunakaz, horreetako batzuk estreinaldiak. Lan horreek txandakatuz joango dira Bilboko barrutietatik, abenduaren 20ra arte. Emonaldiak ohiko eszenatokietan eskainiko dira, Abandoko, Begoñako, Otxarkoagako, Errekaldeko, San Frantziskoko eta Altamirako udaltegietan, Solokoetxeko institutuan, eta Zurbaranbarri ikastetxe publikoan.

Barrikuntza lez, Bilboko Zirkuituak urteko azken hiruhileko honetarako antolatu dauen programazinoak, umeei eta familiei zuzendutako emonaldi bereziak jasoko ditu abenduan euskeraz, Gabonetatik gertuen dagozan egunetan. Izan be, bertako talde afizionatu edo erdi-profesionalei, batez be, euren lanak aurkezteko aukerea eskaintzeaz gan, Bilboko Zirkuituak Arte Eszenikoetarako ikus-entzule barriak be sortu nahi ditu, Bilboko kultur eskaintzea beste eskaintza eszenikoak heltzen ez diran uriko barrutietara eroanez.

Bilboko Zirkuituak bederatzi antzerki konpainia izango ditu urteko azken hiruhileko honetan, programa honen barruan gehienak barriak diranak. Taldeak honako honeek dira: Los Man Ones, Plataforma Tirante, Totum, Burbujas, Nexo, En la Lona, Jon Urraza eta Jon Zubiaga, Teatro Pantzart eta Las Entes.

Los Man Ones taldea izango da programazinoari hasierea emongo deutsona, eguenean, izen bera daroan ikuskizunagaz, jantza garaikide eta musika inprobisazino lanagaz. Otxarkoagako udaltegian izango da emonaldia, arratsaldeko 19:30etik aurrera. Urrirako programautako ganerako emonaldiak, Bilboko Zirkuituan ibilbide luzea daben hiru konpainiak eskainiko ditue. Gainera, Bilbon antzerkia egiten urte asko daroezan emakumeen oso presentzia azpimarragarria daben taldeak dira; Plataforma Tirante, Totum eta Burbujas taldeak dira, La vie en 2, Despreocupadas eta Nunca nos regalaron flores ikuskizunakaz, hurranez hurran.

Bilboko Zirkuitua programea eten egingo da Antzerki eta Dantza Garaikide Jaialdia, BAD, ospatzen dan bitartean —urriaren 26tik zemendiaren 4ra— eta barriro ekingo deutso bere bideari zemendiaren 15ean, Otxarkoagako udaltegian, Nexo taldearen 49 fragmentos azken lanagaz.

Abendua

Bilboko Zirkuituak umeei eta familia osoari eskainitako bost ikuskizun programau ditu, horreetatik bi euskeraz. Proposamen barritzaileenen artean, En la lona taldearen Momentu Ridiccoli ikuskizunaz gan, Teatro Pantzart taldearen Boli, bili, boli lana azpimarratu behar da (abenduak 14), Juan Kruz Igerabide poeta eta idazle gipuzkoarraren testuetan oinarritua. Igerabideren lanaren ezaugarrietako batzuk umorea eta forma laburren erabilerea dira. Bertsoak, marrazkiak, abestiak eta papelezko objektuak buztartzen dituan ikuskizun osoa eskainiko dabe.

Urteko azken hilean helduei zuzendutako eskaintzaren barruan, azpimarratzekoak dira Morrison eta Gartzia: kultuko antzezlana ikuskizun dibertigarria (abenduak 13), euskeraz eta pieza eszenikoak nahasten dituan Las Entes konpainiaren Las inDOGMAbles lanaren estreinaldia (abenduak 20). Ohikoa danez, emonaldi guztiak arratsaldeko 19:30ean hasiko dira, eta sarrerea librea izango da, leku guztiak bete arte.

Bilboko Zirkuitua programea, genero horretako ekimen aitzindaria eta bakarra da Euskadi osoan. Bilboko Udaleko Kultura eta Hezkuntza Sailak argiztapen eta soinu zerbitzu teknikoa eta publizidadea eskaintzen deutse bertako konpainiei, hasten dagozanei edo ibilbide profesional laburragoa dabenei, batez be, eta baita konpensazino ekonomiko bat be. Programazinoan formatu txikiko lanak eskainiko dira, gaztelaniaz eta euskeraz.

Bilboko Zirkuitua (Urria-abendua 2012)

URRIAK 4: Los man ones (Los Man Ones konpainia) Otxarkoagako udaltegian.
URRIAK 10: La vie en 2 (Plataforma Tirante konpainia) Solokoetxe institutuan.
URRIAK 23: DespreOKUPAdas

URRIAK 24: Nunca nos regalaron flores (Burbujas konpainia) Errekaldeko udaltegian.
AZAROAK 15: 49 fragmentos (Nexo konpainia) Otxarkoagako udaltegian.
AZAROAK 29: La vie en 2 (Plataforma Tirante konpainia) Basurtuko udaltegian.
ABENDUAK 11: Momentu Ridiccoli (En la Lona konpainia) Begoñako udaltegian. Euskaraz
ABENDUAK 12: Momentu Ridiccoli (En la Lona konpainia) Altamirako udaltegian. Euskaraz
ABENDUAK 13: Morrison eta Gartzia (Jon Urraza eta Jon Zubiaga) Abando - Barrainkuako udaltegian. Euskaraz.
ABENDUAK 14: Boli, bili, boli (Teatro Pantzart) Castañoseko udaltegian. Euskaraz.
ABENDUAK 18: Mementu Ridiccoli (En la Lona konpainia) Zurbaranbarri ikastetxean. Euskaraz
ABENDUAK 19: Los man ones (Los Man Ones konpainia) San Frantziskoko udaltegian.
ABENDUAK 20: Las inDOGMAbles (Las Entes konpainia) Errekaldeko udaltegian.