'Hodeietan' liburua argitaratu dau Elhuyarrek

Hodeietan —gazteentzako narrazino zientifikoko liburua— argitaratu barri dau Elhuyarrek, eta gaur izan da liburuaren aurkezpena, Koldo Mitxelena Kulturuneko areto nagusian, Liburuaren Nazinoarteko Egunean hain zuzen be. Han izan dira Aitzol Lasa, Hodeietan liburuaren idazlea, eta Lurdes Ansa, Elhuyarreko Edizinoak saileko arduraduna.

Narrazino zientifikoa da Hodeietan, eta 12-16 urteko gazteei zuzenduta dago. Gipuzkoako Foru Aldundiaren babesa izan dau sorkuntza-lan honek. 2011ko CAF-Elhuyar sarietan, barriz, Gazteei zuzendutako zientzia-narrazinoak kategorian irabazle izan zan. CAF-Elhuyar sarien helburuak dira zientzia eta teknologiaren arloko gaien eta ikerketen euskerazko dibulgazinoa, kazetaritza eta narrazino-lanak bultzatzea, saritzea eta autortzea. Gazteei zuzendutako zientzia-narrazioak kategoriako lanak gazteei zuzendutako narrazinoak dira, euskeraz sortuak. Lan horreetan, zientzia- eta teknologia-gaiak jorratu behar dira, ezinbestean, zeharka bada be. Zientzia-narrazinoen bitartez gazteak zientziara eta teknologiara modu atsegin eta erakargarrian hurreratzea da sariketearen helburua.

Hodeietan liburuaren trameari jagokonez, Hodei dogu protagonista. Batxilergoko azken ikasturteko ikaslea da Hodei, eta ez ditu bereziki gustuko zientziak. Estibalitz, ostera, zientzialari trebea da. Nerabezaro osoan izan dau gustuko Estibaliz Hodeik, eta, udan bizi izan daben maitasun-istorioaren ondoren, aldatzen hasi da Hodeiren zientziagazko ikuspegia.

Idazlea, Aitzol Lasa Oiarbide, barañaindarra da, sortzez, eta matematikaria, lanbidez. Nafarroako Unibersidade Publikoan dihardu, matematikaren didaktikearen arloan. 2009an, Barañain Hiria literatura-lehiaketea irabazi eban, Aipa ditzagun emakumeak atalean, Udako arratsalde bat ipuin laburragaz. Horrezaz gan, lau urte emon ditu Euskalerria irratian (Arratsalde.on) eta Eguzki Irratian (Plano konplexua) matematikari buruz berbetan.

Lurdes Ansa, Elhuyarreko Edizinoak saileko arduradunak aurkezpenean aitatu dauenez, Elhuyarren ZzL serieko hirugarren obrea da hau. Gazteentzako zientzia-narrazinoko irakurketa-liburuak argitaratzen ditu ZzL serieak, eta honeek dira aurreko biak: Simon Bloom, grabitatearen zaindaria eta Platonen Urmaela. Lapurtutako giltzaren bila.

Papelean zein formatu digitalean eskura daiteke liburua. Papeleko bersinoa dagoeneko salgai dago, 14 €-an, Elhuyarren Interneteko dendan (www.elhuyar.org/edizioak) eta liburu-denda nagusietan. Formatu digitala be Interneteko dendan eros daiteke, 4 €-an. Papelezko ale bat erosita, formatu elektronikoko bat opari, doban.

Liburuaren Nazinoarteko Eguna ospatzeko, bestalde, Lurdes Ansak aitatu dau Elhuyarren zientziako eta euskerazko produktuak % 10 merkeago izango dirala (bialketa-gastuak, doban), apirilaren 23tik maiatzaren 7ra arte Elhuyarren Interneteko dendan egiten diran erosketetan (www.elhuyar.org/edizioak).

Ikusi argazki guztiak handiago