Guggenheim Bilbao Museoak onespena emon deutso Guggenheim Helsinki proiektuari

| Ikusi handiago | Argazki originala

Guggenheim Bilbao Museoko Fundazinoaren Batzorde Betearazlea gaur goizean batzartu da Guggenheim Helsinki proiektua aztertu eta horri buruzko jarrerea erabagiteko.

Batzorde Betearazlearen eretxiz, Guggenheim Sarearen barruan museo-espazio barri bat edegitea ezin daiteke mehatxutzat hartu. Izan be, guztiz desbardinak dira bakotxak erakarri nahi dauen publiko motaren jatorri geografikoa eta eredu kontzeptuala. Hori dala eta, lehian ibili beharrean alkarlanean ibiliko dira eta ikuspegi eta helburu desbardinetatik abiatuta batak besteari modu positiboan eragingo deutsie.

Helsinkiko proiektuak aukera barriak eskainiko deutsoz Bilboko museoari: jardun-eremuak zabalduko deutsoz, hainbat lurraldetan banatutako sare baten barruan sinergiak sortarazoko ditu, Guggenheim markearen nazinoarteko irudia hobetuko dau, eta Guggenheim Bilbao Museoaren garrantzia indartuko du Sarean. Horrezaz gan, Bilbo eredu izango da Guggenheim erakundeak garatzen dagozan proiektu barrietarako, esate baterako, Guggenheim Abu Dhabi edo aitatutako Helsinkiko proiektua.

Horregaitik guztiagaitik erabagi dau Guggenheim Bilbao Museoaren Fundazinoaren Batzorde Betearazleak bere onespena emotea Helsinkiko proiektuak aurrera egin daian: beti be Solomon R. Guggenheim Museumek antolatutako erakusketak Europara etorten diranean lehenengo egoitzea izateko aukerea Bilboko museoari eskaintzen bajako. Beraz, Europako egoitzetako erakusketen kostuak banatu egingo litzatekez, dirua aurreztuz, eta, gainera, alkartrukea sortuko litzateke alderdi tekniko, profesional, artistiko eta kulturaletan. Horrek danak ezagutza sortzea eta banatzea ahalbidetuko leuke, bakotxaren identidadetik abiatuta kulturea aberastea ekarriko leuke eta, era berean, alkarlanean proiektuak egiteko aukerea emongo leuke.

Guggenheim Bilbao Museoak eretxia emoteko eskubidea izango dau Helsinkiko proiektuan sortu leitekezan aldaketen inguruan, eta, Europan beste edozein Guggenheim proiektu egitekotan, onespen eskubidea be izango dau, orain arte lez.