Bilbok XIX. mendean bizi izandako hedapena aztertu dabe 'Bidebarrieta' aldizkarian

| Ikusi handiago | Argazki originala

Bidebarrietahumanitateei eta gizarte zientziei buruzko aldizkariaren 22. zenbakia Interneten argitaratu barri dabe Bilboko Udaleko Kultura eta Hezkuntza Sailak, Bidebarrieta Kulturguneak eta Eusko Ikaskuntzak. Joseba Agirreazkuenaga EHUko Historia Garaikideko katedradunaren zuzendaritzapean, Bilbo: hirigunea, zabalkundeak eta mugak liburukian uriak XIX. mendean izandako hedapenari buruzko jatorrizko 20 bat ikerketa-lan argitaratu bakoak jaso ditue.

Igaz, Bidebarrietan bertan egindako Bilboko Historiari buruzko XV. Sinposioan aurkeztutako txostenak batu ditue aldizkarian. Biltzarrean uriaren muga geografikoen eta gizarte guneen bilakaerea aztertu eben, XIX. mendearen lehen urteetatik gaur egunera arte. Bilbok izandako hedapen jurisdikzionalak Deustu eta Begoña elizateekaz eragin eban gatazkea be jorratu dabe agerkarian.

Horrezaz gan, sasoi hareetan ekarpen garrantzitsua egin jakon euskarearen historiari; izan be,1920an, orduan ohikoa ez zan akordioa lortu eben, eta udal erroldan euskerearen ezagutzeari buruzko itauna egin zan. Galdera horren erantzunak kontuan izanda, biztanleen %20k euskeraz ekien. Gaur egun oso informazino baliotsua da gizarte-hizkuntzalaritzearen ikuspuntutik. Mikel Aizpuru Murua eta Karmele Zarraga Sangronizek Hizkuntzaren eremuak. Bilboko euskaldunak 1920. urtean artikuluan jaso dabe horren barri.

1996an sortu zan Bidebarrieta aldizkaria; Bilboren eta bere inguru metropolitarraren historiari eta beste alor batzuei buruzko ikerketak argitaratzen ditu. Argitalpenak kanpoko ebaluazino bikotxa egiten deutse jatorrizko agiriei, eta ANEP-ek B mailako aldizkaria da. 22. zenbaki uskarri digitalean baino ez da argitaratu, EHUko aldizkarien administrazinorako Open Journal System izeneko sistemearen bitartez, komunidade zientifikoaren barruan hedapen handiagoa izateko asmoz.

Bidebarrieta aldizkariaren 22. zenbakia hemen kosultau daiteke.