Kalean da 'Astola' aldizkariaren bosgarren zenbakia

| Ikusi handiago | Argazki originala

Astola aldizkariaren bosgarren zenbakia kaleratu dau Gerediaga alkarteak. Durangaldeari buruzko ikerketak eta azterlanak argitaratu eta sustatzeko asmoz sortu zan urtekaria, 2007an. Bosgarren zenbakia aurreko urteetako prezio berean dago salgai, bost euroan. Daborduko, banatu dabe Durangaldeko liburu-dendatan, eta Durangoko Azokan alkartearen gunean egongo da.

Zazpi ikerketa-nagusi jaso ditue Astola aldizkariaren 5. zenbakian: Askondoko zaldiak (Diego Garate eta Joseba Rios); Durangoko emakumeen kartzela (Maria Gonzalez Gorosarri); Arria erreka (Maite Ibañez); Durangaldea 2027 (Kimetz Munitxa, Hodei Zenikaonandia eta Dani Maeztu); Durango, geltoki nagusia (Jose Mari Uriarte); Bolbora usaina (Karlos Eriz); Ondarearen zalantzako etorkizuna (Jon Irazabal); Zuzenbide zibila Durangaldean (Gontzal Aizpurua); Elorrioko petroleoa (Lorea Madina); eta, Atxondo: hirurak bat (Oihane Buruaga de Sancha).

Askondoko zaldiak artikuluan, Urkuleta auzoko Askondo kobazuloan Goi Paleolitiko garaiko margoak aurkitu dituen arkeologoek aurkikuntzaren garrantzia azaltzen dabe. Maria Gonzalez Gorosarrik Durango 1936 Kultur Alkarteko buruak emakumeek kartzeletan bizi eben egoeraren kontakizuna egin dau, Nevers eskoletan egon zan Durangoko kartzelan izan ziran emakumeen lekukotzak aintzat hartuz. Maite Ibañezek, Arria Erreka testuan, Berrizko erreka horretan zehar ibilbidea egiteko proposamena egiten dau.

Garagarrilaren 26an behin-betiko onartu zan Durangoko Eskualde Egituraren Lurraldearekiko Zati-Egitamua. Durangaldea 2027 artikuluan egileek zer dan eta zer eragin dauen azaldu dabe.

1882. urtetik Durango trenbideen lotunea izan da, Durango-Zumarraga, Bilbo-Durango tranbia eta Durango-Elorrio zein Arrazolako meategietara joian trena. Jose Mari Uriartek hori danori aztertu dau Durango, geltoki Nagusiaen. Bolbora Usainak Elorrion urriaren lehenengo domekako jaia gogoratzen dau egileak.

Jon Irazabalek ondarearen etorkuzinari buruzko gogoeta plazaratu dau eta Gontzal Aizpuruak Durangaldeko zuzenbide zibil bien azterketea egin dau. 1919. urtean Elorrion petrolio-prospekzinoak egiten hasi ziran, eta horren ganekoak batu ditu Lorea Madinak Elorrioko petrolioan. Amaitzeko, Atxondo: hirurak baten, Oihane Buruaga de Sanchak Atxondo udalerriaren barri eskaintzen dau: 2012ko garagarrilaren 5ean 50 urte beteko dira Axpe, Apatamonasterio eta Arrazola eleizateak batu eta Atxondo sortu zana.