Udako etenaren ondoren, BizBAK-ek irailean eskainiko ditu ikastaro gehiago, musika, zinema eta telebista gaiak jorratuz

| Ikusi handiago | Argazki originala

Bizkaia Bilbao Arte eta Kultura (BizBAK) udako ikastaroen lehenengo atala aste honetan amaituko da. Bagilaren 21ean hasi ziranetik, 27 ikastaro egin dira. Universidad del País Vasco/Euskal Herriko Unibersidadeak antolatzen dituan ikastaroetan etena izango da orain eta irailean barriro egongo da aukerea, musika esperimentala, zine dokumentala eta paradigma aldaketa telebistan gaiak jorratzeko. Ikastaro horreetan matrikuletako epea zabalik egongo da seminarioak hasi baino bi egun lehenagora arte.

Basauriko Sozial Antzokian egiten dabilz egunotan azken tailerra. Arte eszenikoetako profesionalei zuzenduta, jantzarako argiztzpenaren diseinua irakasten dabe bertan. Horregaz, aurten 27 ikastaro eskaini dira. Batez be gai kulturalak (zinea, musika, museoak, jantzea…) izan dira jorratu dituenak, baina baita gai sozialak be (ekonomia, kirola…). Era berean, arreta berezia izan dabe ikus-entzunezkoen munduak eta telebistak.

Edozelan be, museologia eta bideojokoen sorkuntza gaiak jorratu dituen ikastaroak izan dira matrikulazino gehien jaso dituenak. Jantza garaikidea, musikea edota matematikak kulturan dauen presentziari buruzko ikastaroek be oso harrera ona izan dabe.

BizBAKeko ikastaroetan parte hartu dabe irakasle moduan, besteak beste, The Yes Men taldearen Mike Bonanno nazinoarteko artisteak, Josep Colom eta Carlos Álvarez musikariek, María Muñoz koreografoak, Borja Cobeaga eta Enrique Urbizu zinegileek edota Enric Álvarez bideo-jokoen maisuak.