Amazonaseko indigenen bizimodua ikusgai Bilbon, argazki erakusketa bati esker

| Ikusi handiago | Argazki originala

Abenduaren 28tik urtarrilaren 5era dago ikusgai erakusketea, Zazpi Kaleetako Bolsa eraikinean, Bilboko Udalaren Bardintasun eta Lankidetza Sailaren ekimenez eta Yan Lur Gobernuz Kanpoko Erakundearen lanari esker. Brasil eta Venezuelako indigenen bizimodua, ohiturak, arazoak eta mundu ikuskerea ezagutu leitekez Mundu indigenarako bidaia izeneko erakusketan, argazki panelen bidez eta baita Hego Amerikatik ekarritako objektuei esker be.

Indigenen bizimodua eta kezkak ez doguz ondo ezagutzen eta bertara hurreratzeko modua da erakusketea, Bilboko Udaleko bardintasun zinegotzi Nekane Alonsok azpimarratu dauenez. Mobimentu indigenistearen garrantzia be nabarmendu dau Alonsok, 'oso kontuan hartzeko korrontea dogu indigenismoa, indigenak tratetako daukan ikuspegiagatik'. Hego Amerikako jatorrizko tribuak gizartean integrau beharrean, euren beharrizanak beteta bizimoduari eustea da gaur egun proposatzen dana, 'berreskuratzea da kakoa, lurra, hizkuntza, errituak berreskuratzea', Nekane Alonsoren esanetan.

Yan Lur taldeak lagundu dau erakusketea atontzen eta Euskal Herriko Gobernuz Kanpoko Erakunde horren eskutik, CIMI alkarteagaz kontaktua egin dabe Bilboko Udaleko ordezkariek. CIMI, Batzorde Indigenista Misiolaria, Amazonaseko indigenak babesteko alkartea da, indigenismoaren ideieagaz bat egiten dauena eta, 300 misiolariri esker, Brasileko talde indigena gehienekaz beharrean dabilena. 'CIMI alkarteari finantziazinoan laguntzen deutsagu guk', azaldu dau Josetxu Ganibek, Yan Lur taldeko arduradunak. Yan berbea guarani hizkuntzan dago eta Lur euskeraz, holan, taldearen izenean bertan, indigenen eta euskaldunen arteko loturea nabarmendu nahi izan dabe.

CIMI alkartearen izenean, Eden Magalhaes idazkari nagusia etorri da Brasiletik eta egun batzuk igaroko ditu Bilbon, Udalak konbidauta, erakusketearen atxakian. CIMI sortu zanetik, indigenen egoereak hobera egin dauela azaldu dau Magalhaesek, '1972an CIMI sortu zanean, indigenak ez ziran inor Brasilen, diktadura militarra egoan eta agintarien asmoa zan tribu guztietako kideak mendebaldeko bizimodura ekartea'. CIMIko misiolariek egoera hori apurtu nahi izan dabe betidanik eta, hasiera baten, mehatxuak sufridu zituen eta bat baino gehiago hil eben indigenen eskubideen alde egiteagaitik. 'CIMI misiolarien taldea da, Brasileko eleizeagaz lotuta dago, baina zeregin nagusia ez da indigenak kristau bihurtzea, sinismenen arteko zubiak eregi eta etnia guztientzat bizimodu hobea bilatzea baino', azaldu dau Magalhaesek.

CIMI sortu zanetik, egoereak onera egin dau, indigena izatea ezinbestean pobreziagaz lotzen eban katea apurtu da eta, garrantzitsuena, indigenei euren lurrak eta ohiturak mantenduta biziteko eskubidea ulertzen dau gizarteak. 'Dana dala, eta Lularen gobernua aurrerakoia izan dan arren, lan handia dago egiteko eta, oraindino, multinazional eta lurjabe handien eskuetan dago etnia askoren etorkizuna', gogora ekarri dau Eden Magalhaesek.

CIMIren datuen arauera, gaur egun, ia miloe bat indigena bizi dira Brasilen eta 180 hizkuntza berba egiten ditue danetara. 'Ikuspegi kapitalistatik, indigenak ez dauka ahotsik, Amazonaseko herriak euren lurretan persegiduta bizi dira eta guk, injustizia hori salatzen jarraituko dogu', ziurtatu dau Eden Magalhaesek. Bilbon zabaldu daben erakusketan, bizirauteko eta duintasuna berreskuratzeko burruka horren barri be izango dogu.