'Ttakun Ttan Ttakun' ikuskizunaren estreinaldi ofiziala egingo dabe zapatuan

| Ikusi handiago | Argazki originala

Juan Mari Beltranen 'Txalaparta' izeneko disko-liburuaren argitalpena dala eta, Mireia Gabilondo aktoreak, Jon Maya jantzariak eta Beltranek berak 'Ttakun Ttan Ttakun' izenburuko ikuskizuna aurkeztuko dabe zapatu honetan, urtarrilak 9, Tolosako (Gipuzkoa) Leidor Antzokian, iluntzeko 20:30ean hasita.

'Ttakun Ttan Ttakun' ikuskizuna Beltranen 'Txalaparta' liburuan eta diskoan egindako ibilbidea jaso eta, 'modu magikoan', musikaz, argiz, irudiz eta poesiaz beteriko ikuskizuna bihurtzen da. Estreinaldi ofiziala izango da zapatukoa.

Obrearen arduradunek azaldu dabenez, 'Txalaparta' Juan Mari Beltranen maisu-lana da, testu, irudi, partitura, eta argazki ugariz osotua. CD eta DVD bategaz lagunduta, lan hori ikerketa- eta dokumentazino-jardun luze baten ondorioa da eta musikea ahalik eta ondoen ezagutzeko oinarriak jartea dau helburu. Obreak arreta berezia egiten deutso txalaparteak azken 40 urteetan egin dauen ibilbideari eta izan dauen eraldaketari, musikalki, sozialki, antxinako joteko eratan zein joera barrietan.

Hori guztia 'Ttakun Ttan Ttakun' izeneko ikuskizunetan aurkeztuko da eta Juan Mari Beltranek, Mireia Gabilondok eta Jon Mayak 'memoriaren lurralde urrunenetara' eroango dituen ikusleak, 'imajinau daitekezan erritmo eta aukera guztietan, irudi, jantza eta argi-gerizpen joko zoragarrien bitartez'.

"Joaldi tradizionalak soinu eta espresio berriekin nahastuko dira, bikote, hirukote eta laukotean egindako erritmo, doinu eta kolore askotako joaldi bereziz, edota ahots joko eta poesia hutsez beteriko ikuskizun honetan", adierazi dute.