Badator Euskaltzaindiak argitaratu eta Bernardo Atxagak zuzenduko dauen 'Erlea' kultur aldizkari barria

Erlea kultur aldizkari barria aurkeztuko dabe eguenean Donostiako Kursaalen, 11:30etan. Aldizkaria Euskaltzaindiak argitaratuko dau eta Jose Irazu 'Bernardo Atxaga' idazle eta euskaltzain osoa da zuzendaria. Pamiela argitaletxea arduratuko da edizinoaz eta diseinuaz.

Arduradunek jakinarazo dabenez, Erlea aldizkaria Euskaltzaindiak abian jarri dauen egitasmoa da eta Akademiaren eta kulturgintzearen arteko loturea sendotzea dau helburu. Literatureagaz lotutako aldizkaria da eta lau hilebetez behin argitaratuko da, Bernardo Atxagaren zuzendaritzapean.

Lehen zenbakian parte hartzen dabenen zerrendea oparoa da: Kolesti Agirresarobe, Kepa Altonaga, Pablo Antoñana, Jon Arano, Aurelia Arkotxa, Joxean Artze, Mikel Asurmendi, Jon Aurre, Marisol Bastida, Frank Bergon, Harkaitz Cano, William Douglass, Irati Elorrieta, Miel A. Elustondo, Estibalitz Ezkerra, Aritz Galarraga, Asun Garikano, Jacinto Iturbe, Joxemari Iturralde, Koldo Izagirre, Xabier Kintana, Mariasun Landa, Monique Laxalt, Bruce Laxalt, Anjel Lertxundi, Xabier Lete, Karlos Linazasoro, Ania Miner, Victor Moreno, Toño Muro, Mari Jose Olaziregi, Lourdes Otaegi, Gloria Totoricagüena, Kirmen Uribe, Andres Urrutia, Gabriel Urza Laxalt, Justin Webster eta Iban Zaldua.

Bestalde, eguenean bertan, iluntzeko 19:00etan, Euskaltzaindiak bere sorrerearen 90. urteurrena dala-eta antolaturik, Paradisua, katuak eta abar emonaldi artistikoa eskainiko dabe Donostiako Kursaalen Bernardo Atxagak eta Juan Carlos Perezek. Emonaldia doban da eta bertara joan ahal izateko konbit-txartela beharrezkoa izango da. Emonaldia egingo dan aretoaren edukiera mugatua da, eta beraz, tokiak agortu arte banatuko dira txartelak. Txartelok www.euskaltzaindia.net/emanaldiartistikoa webgunean eska daitekez, urriaren 7ra arte. Eguenean be jaso ahal izango dira, tokiak bete arte, arratsaldeko 17:00etatik aurrera, Kursaaleko txarteldegian.