Umeak euskerazko hezkuntza ereduetan matrikuletako kanpainea hasi dabe Bizkaiko 46 herrik

| Ikusi handiago | Argazki originala

Bizkaiko 46 udalerrik martxan jarri dabe euskerazko ereduetanmatrikuletako sentiberatze-kanpainea. 2-3 urteko umeak dituen gurasoei zuzenduta dago kanpainea eta seme-alabak lehenengoz matrikulauko dituen familiei gure hezkuntza sistemea osotzen daben ereduen ganeko informazinoa emongo jake.

Ekimena 14.000 familiari zuzenduta dago, eta hurrengo asteetan zabalduko da, honako udalerri honeetan: Alonsotegi, Arrieta, Abanto-Zierbena, Arrigorriaga, Balmaseda, Berango, Berriz, Bilbao, Erandio, Etxebarri, Fruiz, Galdakao, Gamiz-Fika, Gatika, Getxo, Gordexola, Laukiz, Leioa, Maruri-Jatabe, Mungia, Muskiz, Ortuella, Sestao, Urduña, Zaldibar eta Zierbena. Eta honako mankomunidade honeetan: Enkarterri, Txorierri eta Uribe Kosta.

Alkarbidek, Bizkaiko euskera zerbitzuen bilguneak, koordinau dau kanpainea eta, aurreko urteetan legez, 1+1="bi" izango da leloa.

Lelo hori ardatz hartuta, komuniketako eta gizarteratzeko orduan elebitasunak dituan abantailen barri emon gura jake familiei; bide horretan, keinu berezia egin gura izan jake beste herrialde batzuetatik etorri diran gurasoei.

Aurrematrikulazino sasoia

Kanpaina honetan hainbat liburuxka banatu dira, eta euretan hezkuntza sistemea osotzen daben ereduen ganeko informazino zabala emon da. Horregaz batera, udal bakotxeko arduradunak sinatutako gutuna eta eskolan hastear dagozan umeentzako oparia be banatu dira; aurten 1+1="bi" leloa daraman adimen-jolasa jasoko dabe euren etxeetan.


Datu nagusiak

2008-09 ikasturteko datuak oinarri hartuta, Bizkaian, 45.440 ume matrikulau dira haur hezkuntzan. Gehienak, 30.292 haur, D ereduan matrikulau dira, 11.809 B ereduan, 2.876 A ereduan eta 463 X ereduan. Lehen Hezkuntzan 56.540 ikasle matrikulau dira, 32.395 D ereduan; 17.206 B ereduan; 6.116 A ereduan eta 823 X ereduan.

Datu horreek aintzat hartuta, 2008-09 ikasturtean, ikasleen % 6,3 matrikulau da A ereduan, % 25,98 B ereduan eta % 66,6 D ereduan, hau da, euskera hutsezkoan.

Igazko ikasturtean % 7,20ak ikasi eban A ereduan, % 26,06 B ereduan eta % 65,76 D ereduan.