‘Una ría con duende’ topaketa flamenkoen jaialdia egingo da Bilbon

| Ikusi handiago | Argazki originala

Hirugarren urtez, zapatu honetan, irailak 13, hasi eta urriaren 10era bitartean, Una ría con duende topaketa flamenkoen jaialdia egingo da Bilbon. Ekimen horren bitartez, Bilboko Udaleko Kultura eta Hezkuntza Sailak eta Sonikete produktoreak Bizkaiko uriburura hurreratu gura ditue flamenkoaren hegoaldeko erritmoak, askotariko eta begi-bistako kultur eraginak batu eta mueta askotako publikoak atrapetako gaitasuna dauen musika-genero honen ezagutza sustatzeko asmoz.

Aurtengo edizinoan, kontzertuakaz batera, erakusketak, desfileak, berbaldiak, proiekzinoak eta tailerrak batzen dituan ekitaldi-programa zabala preparau da. Uriko kultur eskaintzan errotuta dagoan jaialdia agertoki desbardinetan izango da ikusgai: La Concordia tren-geltokian, Berreginen Museoan, San Frantziskoko udaltegian eta Bilborock aretoan.

Kontzertuak

Aurreko edizinoetan legez, kontzertuak izango dira jaialdiaren ardatz. Atal honetan, Rosario Guerrero La tremendita kantariak eskainiko dauen emonaldia nabarmendu behar da. Artista flamenko gazte hori Sevillako Triana auzoan jaio zan 1984an eta, lehenengo eszenatokia zapaldu ebanetik, flamenkoaren jatorrizko nortasuna zaintzen ahalegindu da, ahotsean zein mobimentuetan, baina beste genero batzuetako eraginei lepoa emon barik. Debuta hamaika urte zituala egin eban eta, geroztik, kantari eta musikaririk ezagunenakaz batera lan egin dau. Bilboko ekitaldian, Salvador Gutierrez-en gitarra eta bere aita Jose Guerrero ‘El tremendo’ kantariaren txaloak izango ditu lagun. Kontzertua urriaren 4an egingo da Bilborock aretoan (sarrerea: 20 euro), ‘Flamenkoa eta emakunea’ zikloari hasiera emoteko. Emakume kantari eta jantzariek flamenkoari hasiera-hasieratik emon deutsen ikuspegia aztertzea da atalaren helburua eta Una ría con duende ekimenaren hurrengo edizinoetan atal finkoa izatea espero da.

Bilborock aretoan, baita, Paco del Pozo kantariak emonaldia eskainiko dau zapatuan, irailak 27 (sarrerea: 15 euro). Del Pozok sari ugari jaso ditu, berbarako, 1997ko Meategietako Kantu Jaialdiko Meatzari Lanpara dalakoa. Ibilbide luzea egin dau honezkero, eta ibilbide horretan joera barriak erabili izan ditu, jazz taldeakaz zein gitarra-jotzaile klasikoakaz batera lan egin baitau. Oraingo honetan, Madrileko Corral de la Morería jantzaleku flamenkoko Rafael Peral jantzariagaz batera taularatuko da.

La tremendita eta Del Pozoz gan, aurtengo kontzertu eta errezitaldi programea osotuz, Jose Luna y Arena fina eta Manolo Franco eta Laura Vital artistek doban eskainiko dabe ikuskizuna. José Luna y Arena fina flamenko barrian dagoan gazte-talderik garrantzitsuenetarikoa da eta ikuskizunetan osogai musikal eta eszeniko klasikoak eta beste adierazpide artistiko batzuk buztartzen ditue. La Concordia tren-geltokian izango da emonaldia, zikloko lehenengoa, irailaren 13an.

Bestalde, Laura Vital-ek eta Manolo Franco-k San Frantziskoko udaltegiko auditorioa beteko dabe zapatuan, irailak 20, De la soleá a la bulería deritxan ikuskizunagaz. Kontzertu didaktiko honetan, Vital-en ahotsak eta Franco-ren gitarreak ibilaldi berezia eskainiko dabe flamenkoaren estilo desbardinetatik, generoaren osogai estilistiko barriak eta literaturako eta Andaluziako herri-kulturako baliabide garrantzitsuak erakutsiz.

Bestelako ekimenak

Tailerrak, zinema, moda eta argazkigintzea jantza, kantua, gitarrea eta perkusino tailerrak dira Una ría con duende programako beste ekimenak. Ikastaroek launa orduko iraupena izango dabe (jardunaldi bitan) eta irakasleak honako honeek izango dira: Maria Marin eta Yolanda Lorenzo jantzariak; Eduardo Florido eta Rosario Guerrero La tremendita kantariak; Jose Maria Ramirez, Marco Borge eta Jose Antonio Conejo Vida Chaparro de Málaga gitarra-jotzailea eta Ander Sanchez eta Pakito El aspirina perkusino-jotzailea.

Bestalde, jaialdiak leku berezia eskainiko deutso zinemearen eta flamenkoaren arteko buztarketeari. Edizino honetan, zazpigarren artearen zaleek ondoko emonaldi honeez gozetako aukerea izango dabe: alde batetik, Michael Meert-en Herencia flamenca izenburuko dokumentalaz eta, bestetik, Alvaro Alonsoren Los almendros-Plaza Nueva film laburraz.

Azkenik, programa horren barruan, Ana Alaez diseinatzaileak soineko flamenkoen desfilea egingo dau Artelan Berreginen Museoko eszenatoki ikusgarrian; eta horregaz batera, Flamencópolis, flamenco en el mundo izenburupean, argazki-zaletuek flamenko eskolan eta eszenatokietan ataratako irudiak batzen dituan argazki erakusketea be ikusi ahal izango da San Frantziskoko udaltegian irailaren 15etik 30era bitartean. Pedro de Jodar eta Juanjo Navas kantariek eta Jose Maria Ramirez eta Marco Borge gitarra-jotzaileek berbaldia eskainiko dabe, El viaje del fandango izenburupean, generoak Andaluziako probintzietan dituan aldaerak aztertzeko.