Esne Beltza taldeak 'Made in Euskal Herria' diskoa aurkeztu dau

| Ikusi handiago | Argazki originala

‘Made in Euskal Herria’ diskoagaz azaldu jaku Xabier Solano (Etzakit, 4 Itzal, The Solanos...) musikariaren proiektu barria. Esne Beltzaren abiapuntua Jamaikan koka daiteke eta, era berean, Fermin Muguruzaren Euskal Herria Jamaika Clash diskoa (2006) grabetako Xabier Solanok (ahotsa eta soinu txikia), Jon Elizaldek (tronboia) eta Xabi Peryk (produktorea) Bob Marleyren Tuff Gong estudio mitikora egin eben bidaiagaz lotu. Kingston uriburuan reggae musikari eta produktore esanguratsuenetako batzukaz lan egitek aukerea izan eben, BECen emondako kontzertu gogoangarria etorri zan gero, eta haren ondoren, Afro-Basque Fire Brigade taldeagaz munduari emondako birea. Alkarregaz eskainitako kontzertuetan, Japoniatik Bartzelonara, Mexikotik Irlandara, Bilbotik Habanara egindako bidaia luzeetan eta hoteletalo logeletan izandako solasaldietan mamituz joan zan Esne Beltza, Xabier Solano buruagaz batera, Etzakit, The Solanos, Joxe Ripiau, Izotz Selektah Kolektiboa eta Su Ta Gar taldeetan ibilitako beste zortzi musikariz osotutako taldea.

Kontuak kontu, soinu, erritmo (soul, ska, reggae) eta hizkuntzen arteko nahasketea buztartzen ditu Esne Beltzak bere lehenengo lanean.

Beste alde batetik, ‘Made in Euskal Herria’ diskoan, batez be, ahotsetan kolaborau dabenen zerrendea sekulakoa da. Solanogaz Muguruzaren taldean ibilitakoez gan (Sorkun, Stephane Walace eta Daniel Ray jamaikarrak, Leo kubatarra, Oskar Benas, Muguruza bera...), Yacine Belahcene aljeriarra (Cheb Balowski, Nour), Favio italiarra (Transalpine Boys in Island), Sergio Gonzalez mexikarra, Kyou Sakurai japoniarra eta Euskal Herriko Moro (Bad Sound System), Jimmy Arrabit (Itoiz, King Mafrundi, Arrabit Trio), Txus Aranburu (Tapia eta Leturia) edota Kristina Solanok (M-en Ezten) hartu dabe parte diskoan, besteak beste.