Euskera Kultur Alkargoak, Topaguneak eta ONCEk diru-laguntzinoa jasoko dabe euskerea sustatzen segiduteko

Eusko Jaurlaritzako Kultura Saileko Hizkuntza Politikarako Sailburuordetzak hiru lankidetza-hitzarmen sinatuko ditu datozan asteetan Euskeara Kultur Alkargoagaz, Topagunea Euskera Alkarteen Federazinoagaz eta ONCE Espainiako Itsuen Alkarte Nazionalagaz. Danetara, 203.000 euro jarriko dira hitzarmen horreetan, Hizkuntza Politikarako Sailburuordetzeak jakinarazo dauen legez.

Euskera Kultur Alkargoak euskerearen eta euskal kulturearen alde egiten dauen lanaren garrantziaz jaubetuta, Eusko Jaurlaritzako Hizkuntza Politikarako Sailburuordetzeak 60.000 euro jarriko ditu Nafarroako Foru Erkidegoan jarduten dauen alkargoaren 2007ko jarduerea laguntzeko.

Ganera, Topaguneagaz sinatuko dan hitzarmenagaz, hiztunen artean euskerea erabilteko bideratzen diran eta bidera daitekezan ‘Mintza praktika’ izeneko egitasmo barriak sustatu gura dira, eta, aldi berean, martxan dagozanen jarraipena eta ebaluazinoa egin gura da. Hitzarmena igaz sinatutakoaren jarraipena da eta, aurten, 72.776 euro jarriko ditu Eusko Jaurlaritzak zeregin horretarako.

Azkenik, Espainiako Itsuen Alkarte Nazionalagaz (ONCE) sinatuko dan hitzarmenaren bitartez, ikusmen urritasuna daben euskaldunek dozenaka euskerazko literatur lan irakurteko aukerea izango dabe. Era berean, euskera-gaztelania hiztegi bat be izango dabe eskuragai. Aurtengo ekitaldian 70.000 euro jarriko ditu Hizkuntza Politikarako Sailburuordetzeak horretarako eta hitzarmen hori aspalditik datorrenaren jarraipena izango da. Gaur egun, 163 liburu dagoz jarrita Braille hizkuntzan eta 344 Daisy sistema digitalean.