Itziar Laka eta Xabier Kaltzakorta bizkaitarrak Jose Luis Lizundia euskaltzainaren lekua hartzeko prest

| Ikusi handiago | Argazki originala

Daborduko euskaltzain emeritu dan Jose Luis Lizundiaren ordezkoa aukeratuko dau laster Euskaltzaindiak. Hautagaiak aurkezteko epea datorren astean amaituko da, bagilaren 28an. Hautagai bi dagoz momentuz, Xabier Kaltzakorta eta Itziar Laka.

Miren Azkaratek, Patxi Goenagak, Beñat Oihartzabalek eta Pello Salaburu euskaltzainek aurkeztu eben Itziar Laka bilbotarraren hautagaitzea maiatzean. Eta orain, Xabier Kaltzakortaren proposamena helarazo dabe Andres Urrutia euskaltzainburuak, eta Adolfo Arejita, Xabier Kintana eta Patxi Uribarren euskaltzain osoek. Garagarrilean jakinarazoko dabe zeinek beteko dauen Lizundiak itxitako lekua.

Xabier Kaltzakorta Markina-Xemeinen jaio zan, 1961ean. Euskal Filologian lizentziatua da, eta arlo horretako irakaslea da gaur egun Destuko Unibersidadean. Euskaltzain urgazlea da eta Akademiako Ahozko Literaturako Batzordeko kidea. Labayru Ikastegiko kidea be bada. Herri-literaturan aditua da, gai horren ganeko artikulu ugari argitaratu ditu, besteak beste, Lojibarreko Alhabaren Khantorea, Berreterretxeren Khantorea gainean berriz ere, Gabon-kanta zahar baten aldaerak eta Alfonso Irigoien-en poesiaz harripausu bat edo beste.

Itziar Laka bilbotarra da, 1962an jaioa. Laka be euskaltzain urgazlea eta Euskal Filologian lizentziatua da. Doktore tesia AEBetan egin eban. Hizkuntzalaritza irakaslea da EHUn. Gramatikeari buruzko makina bat artikulu idatzi ditu. 2004an be euskaltzain izateko hautagaia izan zan, Andolin Eguzkitzaren ordez, baina Adolfo Arejita izentau eben.