Microsoft Local Language Program Award saria jaso dau Eusko Jaurlaritzeak

| Ikusi handiago | Argazki originala

Microsoftek Microsoft Local Language Program Award saria emon deutso Eusko Jaurlaritzeari euskerazko Windows Vista eta Microsoft Office 2007 produktuen zabalkundean, HP, Invest eta Dellen babesagaz gauzatua, erakutsitako konpromiso eta lankidetzeagaitik, Informazinoaren eta Komunikazinoaren Teknologien (IKT) alorrean euskerea garatzeko erakutsitako sentsibilidade eta konpromisoagaitik.

Gasteizko Gran Hotel Lakuan egindako ekitaldian, Miren Azkarate Kultura sailburua eta Patxi Baztarrika, Hizkuntza Politikarako sailburuordea egon ziran Eusko Jaurlaritzaren izenean. Ekitaldian, Miren Azkaratek Microsoft Ibéricako Harreman Instituzionaletarako Kudeatzaile Montserrat Pardo Bayonaren eskutik jaso eban Microsoft Local Language Program Award saria.

Sariagaitik eskerrak emon eta Azkaratek Microsoftek euskereagazko nahiz Estaduko ganerako hizkuntzakazko erakutsi dauen inplikazinoa azpimarratu nahi izan eban. Bestalde, Gasteizko ekitaldian, bagila eta iraila bitartean abian jarritako 'Klik egin euskereari' deskarga lehiaketearen irabazleei sariak banatu jakezan. Hona hemen irabazleen izenak: Xavier Calvo, Mikel Iridoi, Rebeka Arias eta Lilian Pezo.

Sari honegaz, Microsoftek bere esker ona adierazo deutso Eusko Jaurlaritzeari, Hizkuntza Politikarako Sailburuordetzearen bidez, Estaduko eleaniztasuna teknologia barrietara eta Internetera zabaltzeko pausu sendoa emon dauelako. Programea euskerazko Office 2007 eta Windows Vistari egindako hizkuntza-aplikazinoetan oinarritzen da. Gogoan izan, aitatu produktuen euskerazko interfazea joan dan bagilean aurkeztu ebela, Dell, Inves eta HPren babesagaz.

Microsoft Ibéricako Harreman Instituzionaletarako Kudeatzaile Montserrat Pardo Bayonak Kultura Sailburu Miren Azkarateri eta bere taldeari eskerrak emon eutsezan, IKT-ak euskeraz garatzeko hasiera-hasieratik erakutsi daben sentsibilidade eta konpromisoagaitik. 'Jarrera honek, egunetik egunera, bit bat gehiago hurreratzen dau hizkuntza-normalizazinoa IKTen alor erabagigarrian. Microsoften berenberegi eskertzen eta baloretan dogu zuen ahalegin hori. Horren lekuko, Microsoften Local Language Program Award saria emoten deutsuegu, euskera hutsezko Windows Vista eta Office 2007 produktuen zabalkundean egin dozuen ekarpenagaitik.

Sari hau AEBetatik dator, hain zuzen be Seattletik, bertan baitago gure konpainiaren egoitza. Konpainia globala gara, bai, eta zuena lako ahaleginei esker, gero eta etxekoagoa, gero eta euskaldunagoa. Microsoften lanean jarraituko dogu euskereak Jakintzaren Gizartean merezidu dauen lekua har daian. Era horretan, milaka herritar euskaldun bizi eta euskeraz lan egin ahal izango dabe eguneroko jardunean. Izan be, historia luzeko hizkuntza da euskerea, baina, batez be, etorkizun luzeagokoa', gaineratu eban Pardok.

Microsoftek inbersino garrantzitsua egin dau bere software produktu barrienak euskerara egokitzeko. Doban eta modu erraz eta seguruan deskargetan dan software sinple baten bidez, http://www.microsoft.com/spain/eus/klikegin/deskarga.aspx helbidean eskuragarri, Windows Vista eta Office 2007ren erabiltzaileek euskera hutsean erabili leikiez aitatu programak. Interfaze honeek diseinetako, Microsoftek Eusko Jaurlaritzearen HPSren ezinbesteko laguntzinoa izan eban, aholkularitza lanak eginaz hizkuntza eta terminologia gaietan, eta, era berean, lehenengo euskerazko interfaze bertsinoen ebaluaketan parte hartuz. Horrezaz gan, euskera IKTen alorrean bultzatzeko, Eusko Jaurlaritzeak Microsoftegaz lankidetzan jardun eban euskerazko interfazeen deskarga 'maratoi' bat abian jarriz.