Mendi Tour On Line: 'Cholitas' nahieran eta euskeraz

Bizkaie! 2020-10-06 08:10   Zinemea

Cholitas pelikulea nahieran ikusteko aukerea hemen da Mendi Tour On Line eskaintzeari esker, mendiko pelikula onenak ikusi eta gozetako plataforma barria tarteko dala.

Cholitas Jaime Murciego eta Pablo Iraburu zuzendarien pelikulea da, Arena Comunicación etxe nafarraren erantzun handiko filma (Pura Vida/The Ridge, Nomadak TX, Hasta mañana si Dios quiere, Chauppadi, Bizimina...).

2019ko abenduan, Bilbon aurkeztu eben mundu mailan, XII. BBK Mendi Film Bilbao-Bizkaia Jaialdian eta nazinoarteko lehen saria bertan irabazi eban: Epaimahaiaren Saria. Ana Lía Gonzales, Lidia Huayllas, Cecilia Llusco, Dora Magueño eta Elena Quispe Bilbon izan ziran estreinaldian zuzendari biekaz batera eta emakume hareen istorioa mundu osora zabaldu da ordutik: Andeetako mendirik altuenak igoten ditue emakume indigena boliviarrek eta Aconcaguara (6962 m) eginiko espedizinoa eta euren aldarrikapenak zabaltzen ditue.

Bada, orain, Mendi Tour On Line bidez alokatu daiteke pelikulea (5,50 € / 24 ordu), BBK Mendi Film Bilbao-Bizkaia jaialdiaren plataforma digitala. Mendi Tourra Mendifilmeko pelikula sarituak eta onenak urte osoan zehar aretoetan eskaintzen dituan zirkuitua da, ikusleakaz zuzenean konpartiduten dan esperientzia. Hamar urteko ibilbidean, Espainia osoko 70 uri eta herrietan zabalduta dago, mendiko zinemagintzako eskaintza erreferentea izanik; 2019an, 16.000 ikusle baino gehiago batu zituan eta 2020an, Cholitas da Mendi Tour karteldegiko izarra; orain, ostera, On Line eskaintza honi esker, gehiago zabaldu gura da ha ikusi eta gozetako aukerea.

BBK Mendi Film Bilbao-Bizkaiak sortutako azpidatziak dakarz filmak, euskeraz nahiz gaztelaniaz. Mugarri garrantzitsua da, lehenengo aldiz ikusi ahal izango baita Cholitas on-line euskerazko azpidatziakaz.

Kontuak kontu, Cholitas urriaren 25ean, 18:30ean ikusi ahal izango da Markina-Xemeingo Esperantza Aretoan.


Cholitas nazinoarteko jaialdietan:

- BBK Mendi Film Bilbao-Bizkaia 2019 Epaimahaiaren Saria.

- Festival Gorniskega Filma 2020 (Eslovenia) Sari Nagusia.

- Trento Film Festival 2020 (Italia) Ikusleen Saria Mendiko Film Onenari eta, Elkartasunaren Saria eta Bakea eta Giza Eskubideen aldeko Trentinoa.

- Festival du Film Alpin des Diablerets 2020 (Suitza) Diable d’Or Mendiko Filmari.

- Cervino Mountain Film Festival 2020 (Italia) Italian Alpine Club Award.

- Festival de Cine de Montaña de Ushuaia 2020 (Argentina) Pertsonaia Saria.

Mendi Tour On Line zerbitzu barriaren estreinaldian, beste film bi be eskaintzen dira:

Jurek Jerzy Kukuczka mendizale poloniar handiari buruzko pelikuela, Pawel Wysoczsanski zuzendariarena.

Tom Tom Ballard alpinista britainiar gazteari buruzko pelikulea, Elena Goatelli italiarrak eta Ángel Esteban espainiarrak zuzendutakoa.