Giza Eskubideen Nazinoarteko Egunaren harian, Maria Oianguren eta Asma Jahangir sarituko ditue

Giza Eskubideen Unesco-Bilbao II. Nazinoarteko Saria emoteko ekitaldi ofiziala egingo da barikuan, abenduak 10, Bilboko udaletxean. Unescoren zuzendari nagusi Irina Bokova izango da Bilbon saria emoten, Iñaki Azkuna alkateagaz batera, Giza Eskubideen Nazioarteko Egunaren harian.

Giza Eskubideen Kulturarako Unesco-Bilbao sariduna Asma Jahangir anderea da. Pakistandar jatorria dauen Asma Jahangir abogadu eta aktibistea, gitxiengo erlijiosoen eta emakumeen alde eta umeen esplotazinoaren kontra egindako lan ausartagatik aukeratu dabe.

Bestalde, Eusko Jaurlaritzeak be, egunaren harian, jentaurrean ibilbide pertsonalagaz zein profesionalagaz giza eskubideak sustatzeko, defendiduteko eta zabaltzeko konpromisoaren lekukotza emon daben pertsonak, entidadeak edo gizataldeak autortzea eta saritzea helburu hartuta, Idoia Mendia Justizia sailburuak Gernika Gogoratuz Bakearen aldeko Ikerketa Zentroko zuzendari Maria Oianguren omenduko dau Giza Eskubideen egunean. Saria ohorezko aitamen batek, jentearen autorpenak eta 16.550 euroko diru-zenbatekoak osotuko dabe.

Mahai-ingurua

Bilbon, saria emon aurretik, Giza Eskubideen Aldarrikapen Unibertsalaren urteurrenaren testuinguruan, mahai-inguru bat izango da gaur, abenduak 9.

Unesco Etxeak eta Deustuko Unibersidadeko Pedro Arrupe Giza Eskubideen Institutuak antolatu dabe mahai-ingurua, Bilboko Udalaren laguntzinoagaz. Ekitaldia, 'Giza Eskubideen ekintzaileak diskriminazinoaren kontra jardunean' izenburukoa, barikuan arratsaldeko 18:30ean izango da Deustuko Unibertsitateko liburutegi barriko erabilera anitzeko aretoan. Ekitaldian parte hartuko dabe Asma Jahangir 2010eko Unesco-Bilbao Sariaren irabazle, abogadu eta Pakistaneko Gorte Gorenaren kideak, Leila Zerrougui idazkari nagusiaren ordezkari albokoak Nazino Batuen Misioan Kongoko Errepublika Demokratikoan, Nasila S. Rembe Giza Eskubideen Oliver Tambo Unescoko Katedraren titularrak Fort Hare Unibersidadean (Alice, Hegoafrika), Eduardo Ruiz Vieyteze Pedro Arrupe Institutuko zuzendariak eta Monika Hernando Euskal Herriko Unesco zentroaren ordezkariak.

Ikusi argazki guztiak handiago