Maiatzean zabalduko dabe Bilboko BBK Areto barria

Gran Via zinema-aretoa egoan lekua, maiatzean zabalduko dabe barriro, BBK Areto bihurtuta. Bilboko Kale Nagusiaren 19. zenbakian dagoan espazio mitiko hau erabarritu dau BBK-k 3,5 miloe euroko aurrekontuagaz. Era guztietako kultur ekitaldiak hartuko dituan erabilera anitzeko espazioa izango da.

Danetara, 430 lagunentzako lekua dago areto barrian, eta besaulki-patioa be badauka. Dana dala, espazio zabala lortzeko aukerea be aurreikusi dabe, holan mota guztietako kultur ekitaldiak hartu ahal izateko: kontzertuak, antzezlanak, hitzaldiak, aurkezpenak eta ekitaldi sozialak.

Daniel Freixes Kataluniako arkitektoak diseinau dau proiektua, espazio modernoa nahi izan da, 'jatorrizko estiloa albo batera itxi barik'; esangura horretan, moldurak, marmol eskailera eta baranda lako elementuak mantendu egin ditue.

Kontuak kontu, 'garrantzitsuena aretoaren kokapena da', esan dau BBKko zuzendari nagusi Juan Saenz de Buruagak. 'Kokapen horri esker aretoa uriko kulturan buru-belarri sartuko da. Bilboko Kale Nagusian, Europako kale onenetako batean, holako areto bat izatea gauza handia da', gaineratu dau.

Horrezaz gan, Arriaga Antzokiak eta BBK-k bat egin eta 'Hurbiltasun Antzokia' programazino barriaren bitartez, kultur ikuskizunak eskainiko dira BBK Aretoan. Programa barri horrek Arriaga Antzokiaren 2009-2010 ekitaldiko programazinoa osotuko dau, eta ikus-entzuleei formatu txiki eta ertaineko ikuskizunak eskainiko deutsez, musika, lirika, antzerkia zein jantzearen arlokoak.

Danetara, Hurbiltasun Antzokiak, bere lehenengo edizino honetan, 12 ikuskizun eta Master Class bat eskainiko ditu, maiatzaren 7tik urriaren 10era arte. Sarrerak Arriaga Antzokiko leihatiletan erosi ahalko dira, www.teatroarriaga.com webgunean, 944 310 310 telefono zenbakian, BBK-ko orotarako kutxazainetan eta, saioa hasi eta ordubete lehenago, BBK Aretoko leihatilan.

Ikusi argazki guztiak handiago