BTEK, teknologia ezagutzeko EAEko lehen zentroa

Teknologia ezagutzeko zentro alkarreragilea izango danak, kultura teknologikoa eta barritzailea sustatzea izango dau helburu, baita gazteen artean barrikuntzearen aldeko kulturea eta barrikuntzarako bokazinoa eta izaera ekintzailea bultzatzea be.

Bizkaiko Teknologi Parkeko 602 eraikinean (gaur egun eregiten dagoz) kokatuko da zentroa eta 2008. urtearen azken hiru hilebeteetan abiarazoko da. Abangoardiako arkitekturea izango dau eraikinak, ingurumena zainduko dau eta autoiraunkorra izango da, bertoko estalki nagusia, bereizgarri izango dauena, eguzki-panelez osoturik estalduta egongo baita.

Gizartearen eta Bizkaiko Parkearen zein bertoko enpresa eta Teknologi Zentroen arteko zubia izango da eta hartu-emon bereziak izango ditu Bizkaiko Teknologi Parkean egiten diran zientzia eta teknologia alorreko jarduerakaz.

Erakusketa iraunkorra izango dau zentroak, teknologia sendotuaren (Internet, etxea eta garraioa) erakusgarri bai eta aldi baterako erakusketak be, batez be, ikerketa fasean dagozan teknologi gaiez. Erakusketa iraunkorraren osogarri, tailerrak, bisitaldi gidatuak eta ele biko ikus-entzunezkoak antolatuko dira.

Euskadiko eta eskualde mugakideetako eskola-umeentzat, batez be, DBHko lehen zikloko umeentzat antolatu da zentroa. Abiarazoten dan lehen urtean 3000tik gora ikasle hartzea espero da.

Ondoko erakundeak dira BTEKren erakunde sustatzaileak: Bizkaiko Teknologi Parkea, Elhuyar Fundazinoa, Euskal Herriko Ikastolen Elkartea, Euskal Herriko Unibersidadea, Tecnalia eta IK4 Teknologi Korporazioa. Horrezaz gan, Eusko Jaurlaritzako Industria, Merkataritza eta Turismo Sailaren eta Hezkuntza, Unibersidade eta Ikerketa Sailaren, Bizkaiko Foru Aldundiaren eta Hezkuntza eta Zientrzia Ministerioaren laguntza osoa dauka proiektuak. Edozlean be, bazkide laguntzaile barrien, enpresa arloko bazkide barrien zain dago ekimen hau.

Ikusi argazki guztiak handiago