'Gerrak ez du izenik' albumak irabazi dau 2013ko Etxepare Saria

| Ikusi handiago | Argazki originala

Aurten aurkeztutako 31 lanen artean, Maite Mutuberria ilustratzaile nafarrak eta Leire Bilbao idazle bizkaitarrak alkarlanean eginiko lan batek irabazi dau 2013ko Etxepare Saria: Gerrak ez du izenik lanak, hain zuzen be. Epaimahaia Yolanda Arrieta idazleak, Mikel Valverde ilustratzaileak eta Aitziber Alonso Galtzagorri argitaletxeko lehendakariak osotu dabe. Euren esanetan, egileek bikain buztartu ditue berbea eta irudia, sentimenak eta jazoerak, errealidadea eta fantasia, edozein gerraren ezaugarriak agirian jarriz: gosea, bildurra, tristurea… Eta argazki errealez eta irudi marraztuez osoturiko planoak erabili ditue, berbeari arnasa emon eta kontrapuntu egiteko, bizi iraupenerako dei ozen bat osotuz, armoniaz beteriko album ilustratu honetan.

Saria bakarra da, 5.000 eurokoa, egile eskubideen aurrerapen moduan.

Antolatzaileek jakinarazo dabenez, saritutako lana Pamiela argitaletxeak argitaratuko dau euskeraz, 2013ko udagoienean.

Etxepare saria Nafarroako zenbait udal eta Mankomunidadetako Euskera Zerbitzuek antolatzen dabe, Pamiela argitaletxearen laguntzinoagaz. Album ilustratuen arloan, erreferentzia da euskal letretan.

Maite Mutuberria (Eltzaburu, Nafarroa, 1985) ilustratzailea da. Dagoeneko hainbat lan plazaratu ditu: Hizkuntzaren Keinua (Elkar, 2012), Irati Jimenezen testuaren ilustrazinoa. Zure denboraren truke (Elkar, 2013), Uxue Alberdiren testuaren ilustrazinoa. Horrezaz gan, hainbat testu libururen ilustrazinoak egin ditu Santillana argitaletxearentzat. Hainbat erakusketa be egin ditu bai Nafarroan eta bai Nafarroatik kanpo be.

Leire Bilbao (Ondarroa, Bizkaia, 1978) idazleak ibilbide oparoa daroa, bai haur literaturearen arloan, baita poesia arloan be.