Ramon Saizarbitoriaren 'Martutene' nobeleak irabazi dau 111 Akademiaren Saria

| Ikusi handiago | Argazki originala

Idazle donostiarrak idatzitako Martutene (Erein) eleberriak 2012ko 111 Akademiaren Saria irabazi dau. Aurreko urtean euskeraz kaleratutako liburuen artean gehien gustetan jakiena nabarmentzen dabe Akademiako kideek. Gaur, Liburuaren Nazinoarteko Egunean, ganera Martutene gaztelaniaz kaleratu dau Ereinek.

Maiatzaren 29an egingo dabe 2012ko 111 Akademiaren Saria emoteko ekitaldia, Andoaingo Bastero kulturguneko ekitaldi aretoan, 19:30ean.

Igaz Harkaitz Canoren Twist beharrak bozketa txanda bi nahikoa izan bazituan saria irabazteko, aurten Saizarbitoriarenak lehenengoan lortu dau literatur aipamena jasoteko behar eban boto kopurua. Urtarrilaren 15ean emoneben botoa 188 akademiakideek. Arautegiaren arabera lehenengo txandan saridun izentatzeko derrigor botoen %30 gainditu behar da, Martutene-k %36,53 eskuratu eban. Saizarbitoriaren eleberriaren atzetik boto gehien Kirmen Uriberen Mussche-k izan zituan, %9,61.

Ereinek Martutene-ren gaztelaniazko bersinoa argitaratu barri dau, Liburuaren Nazinoarteko Egunean. Madalen Saizarbitoriak egin dau itzulpena. Oraintsu, Espainiako Kritikaren Sariak jaso dau liburuak, euskerazko arloan.

1996an sortu zan Beterriko Liburua literatur aipamena aurrerantzean 111 Akademiaren Saria izango da, adierazo dabe Akademiako arduradunek. Holan, sariaren eta Akademiaren arteko loturea indartu gura dabe, 111 Akademiaren Saria 111 Akademiak emoten dauela azpimarratzeko. Ganera, sariak hasieran eukan eskualde izaerea aspaldi ganditu zanez, 111 Akademiaren Saria izenak eskualde kutsu hori guztiz ezabatu eta Euskal Herri mailako ekimen baten aurrean gagozala hobeto adierazoten dau, esan dau Eloi Egibar akademiaburuak.