Zabalik da XXV. Rikardo Arregi Kazetaritza Sarira lanak aurkezteko epea

| Ikusi handiago | Argazki originala

Euskerazko kazetaritzearen kalidadea, bikaintasuna eta barrikuntzea bultzatu eta saritzea helburu dauen Rikado Arregi Kazetaritza Sariaren XXV. edizinora lanak aurkezteko epea zabaldu dabe martitzen honetan, martiaren 26an. Lanak aurkezteko epea maiatzaren 13an amaituko da.

Patxi Baztarrika Eusko Jaurlaritzako Hizkuntza Politikako sailburuordeak, Ainara Rodriguez Andoaingo Udaleko alkateorde eta sariaren epaimahaiburuak eta Arantza Aguado Andoaingo Udaleko euskera tenikari eta sariaren epaimahaiaren idazkariak prentsa agerraldia egin dabe Donostian, sariaren deialdia edegiteko.

Andoaingo Udalak antolatzen dau Rikardo Arregi Saria, Eusko Jaurlaritzako Hezkuntza, Hizkuntza Politika eta Kultura Sailaren laguntza eta babesagaz. Euskerazko kazetaritzearen kalidadea, bikaintasuna eta barrikuntzea bultzatu eta saritzea da bere helburua.

Aurkezpenean nabarmendu dabenez, aurten beteko dauen mende laureneko ibilbidean, eredu bihurtu da Rikardo Arregi Kazetaritza Saria, eta gogoratu dabe gaur egun euskerazko kazetari lanean sendotuta dagozan hainbat izen ezagunek jasoa dabela saria.

Modu honetan, 2012. urteko maiatzetik 2013. urteko maiatzera bitartean edozein euskarritan euskeraz argitaratu diran kazetaritza lanak aurkeztu daitekez sarira.

Saria hiru ataletan banatzen da: XXV. Rikardo Arregi Kazetaritza saria (9.000 euro); Kazetari Berria saria (3.000 euro); eta Epaimahaiaren Sari Berezia (4.000 euro). Gainera, lehen bi sari-ataletako saridunei Rikardo Arregi Kazetaritza sariaren kutxa oroigarria emongo jake.

Hiru sari horreez gan, egoki edo beharrezko eretxi ezkero, Aipamen Berezia egiteko aukerea eskura dauka epaimahaiak. Era berean, euskal kazetaritzearen historian ezinbesteko erreferentzia izan diran erakunde, ekimen eta personei Ohorezko Aipamena egiteko aukerea be autortzen jako epaimahaiari. 2013ko udan jakinarazoko da sariei buruz epaimahaiak hartutako azken erabagia, apelaezina izango dana.

Kontuak kontu, lanak maiatzaren 13ra arte bialdu daitekez, honako helbide honetara: Andoaingo Udala; XXV. Rikardo Arregi Kazetaritza Saria; Goikoplaza, z/g; 20140, Andoain (Gipuzkoa).