Bermeo, Urrezko Bikain ziurtagiria jaso dauen Bizkaiko lehenengo udalerria

| Ikusi handiago | Argazki originala

Bermeoko Udalak Urrezko Bikain ziurtagiria lortu barri dau dau, euskeraz jardutearen balioa autortzen dauen agiria, hain zuzen be. Bermeo da ziurtagiria lortu dauen Bizkaiko lehenengo udalerria. Urrezko Bikain Udalaren zerbitzu gehienetan egindako ebaluazinoaren ondorioa da. Euskalitek eta Eusko Jaurlaritzak kudeatzen dabe Bikain, euskerea eta kalidadea lotzen dituan ziurtagiri publiko eta ofiziala.

Zemendiaren 30ean, 19:00etan, jasoko dabe agiria, Blanca Urgell Kultura sailburuaren eskutik. Ekitaldia Guggenheim museoan izango da.

Erakundeetan euskerearen presentzia, erabilerea eta kudeaketea egiaztatzeko tresnea da Bikain, gaur egun indarrean dagozan kalidade sistemetako erispide eta parametroak oinari. Ziurtagiria lortzeko ebaluazinoa lau ardatzetan oinarritu da, Bermeoko Udaleko iturriek jakinarazo dabenez: erakundearen komunikazinoa eta irudi korporatiboa, kanpo-harremonak, barne-harremonak eta hizkuntza kudeaketea. Erakundearen dinamika osoa ebaluetan da.

Bikainen helburua erakundeetan eta enpresetan euskerearen erabilerea baloratzea eta autortzea da. Balorazino hori egiteko, hiru atributu hartu dira oinarri: euskerea erabilteko erakundeak Euskera Planean hartutako neurriak eta erabagiak (euskerea erabilteko erispideak, lan egiteko hizkuntzea izatea, langileak eta zerbitzuak kontratateko erispideak, langileen hizkuntza prestakuntzea…); neurri eta erispideak erakundean zein neurritan zabalduta dagozan; eta, neurri eta erispideon sendotasuna.

Bermeoko Udalak urte luzez euskerearen normalizazinoan bideratzen dauen politika egokiaren, ausartaren eta eraginkorraren autortza izan da ziurtagiria, azaldu dabe Udalako iturriek. Horrezaz gain, aurrera egiteko tresna garrantzitsua da, erakundearen alde sendoak eta ahulak identifiketan laguntzen dauelako, eta hobetzeko proposamenak eskaintzen ditualako.

Urrezko ziurtagiri honek egindako bidea luzea dala erakusten badau be, oraindino zer egin eta zer hobetu badagoela uste dabe. Bermeoko Udalari autortu jakon maila gorenak argi eta garbi ixten dau erakunde, zein enpresek, eta are gehiago Busturialdea moduko eskualde batean, euskeraz funtzionetea errealidadea izan daitekela eta ahaleginak ez dirala alperrik izaten.