Lau instalazino barri daukaz Bizkaiak udalekuetarako

Igone Martinez de Luna (Arabako Foru Aldundia), Lorea Bilbao (Bizkaia) eta Goizane Alvarez (Gipuzkoa) | Ikusi handiago | Argazki originala

Arabako, Bizkaiko eta Gipuzkoako foru aldundiek Udalekuak 2018 kanpainea aurkeztu dabe, Gasteizen egindako agerraldian. Bizkaiari jagokonez, hainbat nobedade eta daturen barri emon dau Lorea Bilbao Kultura diputaduak. Esate baterako, aurtengo ekitaldian lau instalazino barri ipiniko dituala Bizkaiko Foru Aldundiak neska-mutilentzat: Txabarri aterpetxea, Galdamesen; Meakaur, Morgan; Graxiana, Zugarramurdin; eta Trinkete, Lekeition.

Kanpaineak, guztira, 17 instalazino ditu. Bizkaiko Foru Aldundiak bederatzi lagako ditu: Aitatutako laurak eta aurreko urteetan be erabili diran Gorliz aterpetxea, Lapurreketa baserri-eskolea Diman, Lurraska ingurugiro zentroa Ajangizen, La Arboleda aterpetxea Trapagaranen eta Kattalin aterpetxea Legasan.

Arabako Foru Aldundiak hiru instalazino eskaintzen ditu: Barria, Zuhatza eta Valderejo. Eta Gipuzkoako Foru Aldundiak, bestalde,  Orion, Zarautzen, Hondarribian, Seguran eta Zestoan ditu egoitzak.

Udalekuak 2018 kanpainan, euskerearen erabilera informalagaz zuzenean lotutako jarduerak antolatuko ditue. Foru aldundietako ordezkariek zehaztu dabenez, honeek dira helburu nagusiak: euskerearen erabilera informalean komuniketako gaitasunak hobetzea, gure historia eta tradizinoetara hurreratzea eta kirol autoktonoak praktiketea.

Bizkaiari jagokonez, herrialde horretako 1.402 neska-mutilentzako plazak egongo dira, gehien-gehienak (1.332) euskera hutsezkoak. Beste 70 elebidunak izango dira. Garagarrilaren 1etik 29ra bitartean egingo ditue udalekuak, zazpina eguneko txandetan. Zuhatzan hamar egunekoak izango dira egonadiak.

Udalekuetan parte hartzeko eskabideak martiaren 12tik aurrera egin ahal izango dira eta zozketea apirilaren 17an egingo dabe.