Lyoneko Operako Balletak 'Giselle' obrearen bertsino garaikidea taularatuko dau Bilboko Arriagan

| Ikusi handiago | Argazki originala

Bilboko Arriaga Antzokiko 2010-2011 sasoiko jantza-programazinoaren barruan, zemendiaren 20an eta 21ean Giselle ballet ezagunaren bertsino garaikidea aurkeztuko dau Lyoneko Operako Balletak. Zapatuan 20:00etan hasiko da ikuskizuna, eta domekan 19:00etan.

Giselle balletaren alderdi 'ausartena eta garaikideena' aurkeztuko deusku Lyoneko Operaren Balletak, Yorgos Loukos-en zuzendaritza artistikoagaz eta Mats Ek-en koreografiagaz. Danetara, 18 jantzarik interpretauko dabe, eta rol nagusiak Caelyn Knight-ek eta Denis Terrass-ek beteko ditue, lehenengoa Giselle protagonistearen rolean eta bigarrena Albrecht-en rolean -gizonezko rol nagusia-.

Giselle 1841ean estreinau zan Pariseko Operan Adolphe Adam-en musikeagaz, eta XIX. mendeko lehen erdialdean nagusi zan korronte estetiko eta filosofiko barriaren elementu guztiak batzen ditu: amesek eta irrealtasunak inbadidu zituen literatura, antzerkia, operea eta jantzea, materialistegia zan munduari aurre egiteko. Zale beteranoenek akaso gogoan izango dabe Mats Ek koreografoak Cullberg Ballet taldeagaz egindako klasikoaren berrirakurketea, Arriaga Antzokian ikusgai izan zana 1980ko hamarkadan.

Mats Ek-en Giselle obrearen bertsino barrian, koreografo suediarrak paroxismora eroango dau lotan egoana, 'eta barruak astinduko dituan eszenaratze bisionarioa, bortizkeria eta adierazkortasunez betea erabiliko dau horretarako'.

Arriaga Antzokira etorriko dan ikuskizuna bere originaltasunagaitik nabarmentzen da. Mats Ek koreografoaren produzino honetan, jazoerak ez dira kokatzen Alemaniako bazter hotzetan, Tropikoko sumendi-uharte batean baino, oraindino be kea dariona. Arimearen, maitasunaren eta zentzumenen paisajea da, tentazino eta arriskuz betea, zoramenaren mehatxupean jarrita.