Ablazino linguistikoa

Anbotoko Haizorratza 2008-04-23 15:09

Noam Chomskyren arabera, hizkuntza eta dialekto terminoak errez bereiz leitekez: hizkuntzek armadak daukeez; dialektoek, ez. Hortaz, gaztelania armatua gero eta ahulago sentitzen ei da, geure kasuan, euskera babesgabearen herrian. Egoeraren larritasunak guraso erdaltzaleak plataformetan biltzera bultzatu dauz: gaztelaniaz ikasteko eskubidea defendatzen dabe. Aldiz, gaztelaniaz ikasi gura izatea ez da euskeraz ikasi gura ez izatea. Ala ba ete da eskolan euskeraz ikasi eta gaztelaniaz ez dakien hego euskal herritarrik? Euskaldunak, de facto, elebidunak gara. Hortaz, guraso horiek ez dabe gaztelaniaren alde egin gura, ezpada euskerearen kontra. Horretarako, jakina, ez dago eskubiderik, ez behintzat aldarrikagarririk. Ni umea nintzan garaian, gurasoek onena gura ei eben euren seme-alabentzat; gaur, ostera, ez nago hain seguru, izan be, zer da hobea, hizkuntza bat jakitea ala bi? Baina zein bi? Neska nafar baten amak behin esan eustan: es increi­ble que Laura, siendo navarra, no sepa aleman. Euskal Herriko Hezkuntza Administrazinoetan hainbat eredu dagoz, baina aukerak, finean, bi dira: elebiduna izan ala ez. Umea elebiduna bada, euskeraz bizitzeko aukera izango dau. Elebiduna ez bada, ezingo dau euskeraz bizi, eta ez deutse euskeraz biziten itxiko ume elebidunei. Hortaz, guraso batek bere umearen eredua aukeratzean, ez dau soilik berearena aukeratzen. Hanka bi, esku bi, begi bi, belarri bi, hizkuntza bi. Nork gura dau bere seme-alabak herrenak, mainguak, begibakarrak izatea?