Literaldia, euskal letren apirila Bartzelonan

| Ikusi handiago | Argazki originala

Apirila liburuen hilea da Bartzelonan, batez be, 23ko Sant Jordi Eguna. Euskal literatureak be leku nabarmena izango dau Apirileko Errepublika Literarioan, Bartzelonako Euskal Etxeak azpimarratu dauenez. Barrikuntzaz beteta dator Literaldia, ia hilebeteko programazino oparoa. Koldo Izagirre, Mikel Urdangarin, Iban Zaldua, Lauaxeta, Luisa Etxeberria eta Joseba Sarrionandia izango dira protagonista. Horreetako batzuk Kataluniako uriburuan bertan izango dira.

Kulturea jente guztiaren eskura ipintea da Literaldiaren antolatzaileen helburuetako bat. Beraz, ekitaldi gehien-gehienak dobakoak izango dira. Beste helburu bat, jakina, euskal kulturea Bartzelonako publikoari erakustea da, batez be literaturea. Bihar, barikua, egingo dabe lehenengo jarduerea: Pista literarioen bidezko getea, uri guztian zehar.

Apirilaren amaierara arte, berbaldiak, mahai-inguruak, ipuin-kontalariak, tailerrak eta beste ekitaldi batzuk egongo dira. Musikea be ez da faltako eta hilaren 7an, zapatuan, kantu-afaria egingo dabe Ateneu La Basen.

Lauaxetaren testuak katalanera itzultzeko tailerra apirilaren 10ean eta 12an egingo dabe, Nafarren Etxean, eta antolatzaileek zehaztu dabe parte hartzeko ez dala beharrezkoa euskeraz jakitea. Hilaren 14ko saioan, ostera, poesia eta gastronomia buztartuko ditue, Luisa Etxeberriak gidatutako saioan.

Kirmen Uribek eta Mikel Urdangarinek hilaren 18an eskainiko daben saioa be aitatzekoa da. Errezitaldi musikatua da Zaldiak eta beren itzalak izeneko hori. Koldo Izagirreren Sua nahi, Mr Churchill? liburuaren katalanezko itzulpena, ostera, 19an aurkeztuko dabe, Izagirre bera bertan dala.

Literaldiaren azken egunetan be, euskal idazle ezagunak izango dira protagonista: Batetik, Iban Zalduaren eta Suso de Tororen arteko barriketaldia egingo dabe eta, bestetik, Koldo Amestoyk ipuinak kontauko ditu, euskeraz, Drassanes Hizkuntza Eskolan. Amaitzeko, Joseba Sarrionandiaren inguruko Hemen eta hor dokumentala proiektauko dabe.