Literaturea eta gastronomia ardatz, Ines Ortega eta Xabier Gutierrezen arteko barriketaldian

Ines Ortega | Ikusi handiago | Argazki originala

Eztabaidak literatureagaz, idazleakana hurreratzeko modu barria da, jentaurreko barriketaldi edota eztabaidearen bitartez, aurretik proponidutako gai batean oinarrituz. Bidebarrieta Kulturgunearen ekimenak, Inés Ortega gastronomia idazle ezaguna, eta Los aromas del miedo eleberri baltz seriearen bigarren partea dan El bouquet del miedo liburua argitaratu barri dauen Xabier Gutiérrez, Arzak jatetxeko Barrikuntza Zuzendaria alkartuko ditu datorren martitzenean, maiatzaren 17an. Literatura entre fogones izeneko topaketea Almudena Cacho kazetariak gidatuko dau.

Ohikoa danez, topaketea arratsaldeko 19:30ean hasiko da, Bidebarrietako Liburutegiko ekitaldi aretoan, eta sarrerea librea izango da leku guztiak bete arte. Ezin izango da aretora sartu ekitaldia hasi ondoren.  



Xabier Gutiérrez (Donostia, 1960) kozineru, psikologo eta idazlea da. 1990etik Donostiako Arzak Jatetxeko barrikuntza saila zuzentzen dau. Ganera, hainbat komunikabidegaz lankidetzan ibilten da, eta aholkularitza personalizatua eskaintzen deutse elikadurearen sektoreko enpresei. Basque Culinary Centerreko Barrikuntza Masterreko irakasle legez, hogei lan inguru –horreetako asko gastronomiagaz lotutakoak– eta sukaldaritzako estetikeari buruzko bost saiakera argitaratu ditu. Lan horreetatik hamarrek sariak jaso ditue, horreen artean 2005. urteko Gastronomia Sari Nazionala eta Best World Cookbook Award lako sari potoloak.

2015ean, lehenengo eleberria argitaratu eban, El Aroma del crimen, eta horren ondoren El bouquet del miedo, gastronomian oinarritzen dan eleberri baltz tetralogiako bigarren liburukia. Protagonistea Vicente Parra inspektoreordea da, eta bere eszenatokien artean, ardaoa egiteko errituala ezagutzeko aukerea emoten deuskun Arabako Errioxa dago.

Inés Ortegari –Simone Ortega gastronomia idazle ezagunaren alabea– jagokonez, miloe bi ale baino gehiago saldu dituan 1080 recetas de cocina izeneko best sellerraren egilea da. Institutuko irakasle lez egiten dauen lanaz gan, gastronomiaren munduan be badabil. Berak esaten dauen legez, aitaren eta aititaren aldetik jaso eban komunikazinoagazko zaletasuna, eta amak sukaldaritzako pasinoa piztu eutson. Astero idazten dau Hola aldizkarian, irratiko eta telebistako saioetan be ibilten da eta liburu barriak idazten ditu etenbarik. 40 izenburu baino gehiagoko bibliografia zabalean lan honeek nabarmendu daitekez: Sándwiches, canapés y tapas, El libro de los huevos y de las tortillas, Cocina con plantas silvestres, El libro de los postres edo La vía láctea.


Hamargarren edizinoa

2007ko urtarrilean Eztabaidak literatureagaz egitaraua martxan jarri zanetik, 270 egile inguruk hartu dabe parte ekimenean, eta 8.500 persona baino gehiago bertaratu dira. Denpora tarte horretan, Bidebarrietako Liburutegiko ekitaldi aretoak hainbat idazle bikoteren arteko alkarrizketak jaso ditu, besteak beste, Ana María Moix eta Luisa Etxenike, Alfonso Sastre eta Carlos Gil, Luis Eduardo Aute eta Ruper Ordorika, Juan Manuel De Prada eta Aitzpea Goenaga, Juan Bas eta Juan Madrid, Fernando Marías eta Toti Martínez de Lezea, María Dueñas eta Lorenzo Silva, Alberto Vázquez-Figueroa eta Almudena Arteaga, Jordi Esteva eta Rosa Regás edo Juan José Millás eta Pedro Ugarte.

Kultura eta Hezkuntza Sailaren ekimena, idazleakana hurreratzeko modu barria da, jentaurreko barriketaldiaren bitartez, aurretik proponidutako gai batean oinarrituz. Egitarauaren helburua literatureagaz alkartzeko topalekua eskaintzea da, bestelako ikuspegi batetik, letrak eta beste zenbait diziplina lotuz (arkitekturea, musikea, bidaiak edo matematikak, besteak beste), edo literaturaren genero batean oinarrituz, genero horretan sakonduz, egileen eskutik.

Bidebarrieta Kulturgunea, Bidebarrietako Liburutegian dagoan literaturearen eta ezagutza humanistearen eta zientifikoaren zabalkunderako gunea da.