Bizkaie! urtarriletik aurrera batuaz

| Ikusi handiago | Argazki originala

2012ko apirilean 10 urte beteko dituan Bizkaie!, mendebaldeko euskalkia darabilen askotariko agerkariak aro barriari ekingo deutso urtarrilaren 1etik aurrera.

Bizkaie! agerkari kulturala orain 10 urte jaio zanean, bakarra izan zan adierazmolde lez bizkaierea erabilten ebana eta gaur egun be ezaugarri horreek dituan hedabide bakarra izaten jarraitzen dogu; hasieratik euskalkiaren eredu jagia erabiliz, bizkaierearen normalizazino eta bateratze prozesuan ekarpentxua egin dogulakoan gagoz. Horrezaz gan, Interneten konpleju barik sartu ginan geure-geurea dan euskalkiak be sare horretan lekua behar ebala eretxita.

Aitatu ibilbide horretan, Bizkaie! zeozelan eredu izan da eta makinatxu bat euskaltegitan, HABEren Ikasbil unitate didaktikoetan zein hezkuntza arautuan erabili izan ditue gure testuak.

Gaur egun, webgunean egunean batez beste 2.000 bisita inguru daukaguz, egun zehatzetan 5.000era arteko datuakaz. Sare sozialetan be presentzia handia dauka Bizkaie!-k, 1.050 zale webgunearen profilean eta ia-ia 2.800 lagun komunikazinoetarako erabilten dogun profilean.

Testuinguru horretan, bizkaieradunen kopurua mugatua dala jaubetuta eta oinarrian euskerea dagoala kontuan hartuta, ahalik eta erabiltzaile gehiagorengana heltzeko asmoz, 2012ko urtarriletik aurrera Bizkaie! batuaz argitaratzea erabagi dau Bizkaie!-ren zuzendaritza batzordeak. Eztabaida luzeen ondorioz hartutako erabagia izan da, euskereak irabaziko dauelakoan hartutakoa. Gure irakurleek eta harpidedunek erabagia ondo hartuko dabelakoan gagoz; ganera, ez dogu euskalkia guztiz alboratuko, izan be, bizkaiereak bere lekua izaten jarraituko dau atal berezi batean.