Zumaiako 'Baleike' aldizkariak irabazi dau Rikardo Arregi kazetaritza saria

| Ikusi handiago | Argazki originala

Euskarazko kazetaritzearen kalidadea, bikaintasuna eta barrikuntzea bultzatu eta sustatzeko helburuz sortutako Rikardo Arregi Kazetaritza Sarietan, Zumaiako Baleike herri aldizkariak jaso dau aurten Rikardo Arregi kazetaritza sari nagusia, 9000 euroko saria. 'Barrikuntzea eta kalidadea buztartuz, tokikoa eta globala egoki batzen asmau dabe' adierazo dau epaimahaiak. 'Paperean argitaraturiko idazlan asko bideo eta argazki bidez osotzen eta aberasten ditue, gainera, webgunean'. Era berean, epaimahaiak kontuan hartu ditu iturriak zaintzea, idazketa landua erabiltea eta infografiaren eta maketazinoaren ugaritasuna be.

Lan taldearen izenean, Gorka Zabaletak jaso eban saria, aldizkariko zuzendariak. Saria jaso osteko berbaldian, herriko informazinoaren garrantzia aldarrikatu eban Zabaletak: 'Askotan herri informazinoa bigarren mailako informazino legez hartzen da baina guk kontrakoa uste dogu'. Zabaletak adierazo dau gura leukela sariak balio izatea herrian informazino produktu duinak egiten dirala erakusteko.

Beste alde batetik, Berria egunkarian literatur kritikak egiten dituan Beñat Sarasolarentzat izan da Kazetari Berria saria. 'Kritikaren jeneroa menperatzen dau, idazkera bizia darabil eta irakurlearen interesa azkeneraino mantentzen dau', nabarmendu dau epaimahaiak. 'Probokatzailea eta argudio emoilea da, eta genero guztietan mobiduten da'.

Kazetaritza lanei jagokenez, 'Liburu formatuan egina egon arren, kazetaritza lan bete-betea dalako' jaso dau Sari Berezia Imanol Murua Uria kazetariak, azken bake prozesuaz idatzitako Loiolako (H)egiak liburuagaitik. Epaimahaiaren arabera, orain arte ez da holako kazetaritza lanik egin.

Azken buruan, Ohorezko Aipamena 'Argia'-ri emon deutsie. Igaz, 90 urte bete zituan Argiak eta epaimahaiaren ustez, euskal kazetaritzearen 'harrobi oparoa izan da, eta ondo modaltu da aldaketetara'.

Egungo krisi garaian euskerazko hedabideetan 'alarma gorri guztiak piztuta' dagozala nabarmendu dau Argiako zuzendari Xabier Letonak. 'Askotan konplexuz entzun behar izan dogu kulturea eta euskalgintzea diru laguntzez bizi dirala, eta orain, gobernuek bankuak salbatzera, azpiegitura erraldoiak egitera eta abarretara bideratzen dabe dirua'. Euskarazko hedabideak bultzatzeko benetako konpromisoa eskatu deutse erakunde publikoei.


Rikardo Arregi Kazetaritza Sariak 2010