Musikea  III. urtea // 47. zenbakia

'Alkarregaz heldu', Ibilaldia 04ko kantua prest

Kantu bizi-bizia, trikiti eta txalaparta doinu alaiakaz

'Alkarregaz heldu' (Fredi Paia)

Ahate oinak taularen ganean
Ule luze beilegia olatuen artean
Itsosoak Barinatxen jotzean
Euskara daroa bitsean.

Urrezko orraziaren dizdira
Lamine dau urezko ispiluari begira
Ibaizabaletik Kantaurira
Ibilaldira!, Ibilaldira!!

Itsosoak olatuak dakaraz
Belaunaldiz belaunaldi herri honek euskaraz
Kantu, dantza, barre eta jolas
Heldu alkarregaz, heldu alkarregaz

(leloa)
Bizkaiko ikastolen jaialdian
Ander Deuna ta Betiko abian
Alkarregaz heldu ibilaldian
Gure berbak aurrerantza dagian

Itsosotik salto hondartzara
Labarretik gora doaz Lamine ta euskara
Itsasgora datorren erara
Olatuetatik plazara.

Plaza jendez beteten hasi da
Sokorrua zabaldu da euskaldunon herrira
Santa Mariñetik Kurkudira
Ibilaldira!, ibilaldira!!

(leloa)
Bizkaiko ikastolen jaialdian
Ander Deuna ta Betiko abian
Alkarregaz heldu ibilaldian
Gure berbak aurrerantza dagian.

Bizkaie!

Gero eta gitxiago falta da maiatzaren 30erako eta antolaketa beharrak be oso aurreratuta dagoz. Ibilaldia 2004, Bizkaiko Ikastolen aldeko Jaialdiaren antolaketea Leioako Betiko eta Sopelako Ander Deuna ikastolen ardurea da eta alkarlan horren erakusgarri, kantuak eta aurtengo leloak be holan dakar: 'Alkarregaz heldu', "alkarri lagunduz etorkizuna eregiten goazelako. Alkarregaz goaz etorkizuna lantzen eta etorkizuna gure eskuetan dago; etorkizun hori, hartu, oratu egiten dogu, ez deutsagu alde egiten ixten."

Ibilaldia'04ko kantuan Betiko zein Ander Deunako umeak, aita batek (Roberto Moso), ikasle ohi bik (Eñaut Elorrieta eta Fredi Paia), hainbat irakaslek eta musikari ezagunek (Ibon Jordan, Igor Peña, Nicoloz Bitchiashviti, Alberto Rodriguez eta Irkus Ansotegi, Oreka tx, Afrika Bibang) parte hartu dabe. Kontuak kontu, bizpahiru belaunaldi eta estilo desbardinak nahastau dira kantuan.

Kantuaren egileak Xabi Aburruzaga trikitilaria eta Alberto Rodriguez izan dira eta berbak, barriz, Fredi Paia bertsolariak sortu ditu.

Igazko irailaren erdialdera jaso eban enkargua Xabi Aburruzagak eta gusto handiz ekin eutson beharrari. Azkenean, jente piloa alkartu zan proiektua honetan. Grabazinoa Donostiako Elkar estudioetan egin eben Jean Phocas soinu teknikari beteranoaren zuzendaritzeagaz eta danak be oso pozik geratu dirala emoitzeagaz autortu dabe.