Gus Van Sant zuzendariak historia urratu dau Cannesen
Sariak
- Urregorrizko Plamondoa: 'Elephant', Gus Van Sant-ena.
- Zuzendaria: Gus Van Sant, 'Elephant' filmagaitik.
- Epaimahaiaren Sari Ngausia: 'Uzak', Nuri Bilge Ceylan zuzendariarena.
- Epaimahaiaren Saria: 'A Cinq heures de l'après-midi', Samira Makhmalbaf-ena.
- Aktoresa: Marie-Josee Croze, Denys Arcand zuzendariaren 'Les Invasions Barbares' filmagaitik.
- Aktorea: Muzaffer Ozdemir eta Mehmet Emin Toprak, Nuri Bilge Ceylan-en 'Uzak' filmagaitik.
- Gidoia: Denys Arcand, D. Arcand-en 'Les Invasions Barbares' filmagaitik.
- Urregorrizko Palmondoa (Film laburra): 'Cracker Bag', Glendyn Ivin-ena.
- Epaimahaiaren Saria (Film laburra): 'L'homme sans tête', Juan Solanas-ena.
- Urregorrizko Kamerea: 'Reconstruction', Christopher Boe-ena.
Joseba Terreros
Iragarpen guztiei aurrea hartuz, Gus Van Sant zuzendariak Urregorrizko Palmondoa ez eze zuzendaririk onenarentzako saria be irabazi eban, inoiz lortu ez dan sari bikotxa eskuratuz eta Lars Von Trier faborito argia bazterrean itxiz.
Berrogeita hamasei ekitaldiren ostean, lehenengo biderrez emon jakoz pelikula berari Urregorrizko Palmondoa eta zuzendaririk onenarentzako saria. Horretarako, epaimahaiko buruak, Patrice Chereauk, baimen berezia eskatu behar izan eutson Gilles Jacob zinemaldi honen zuzendariari.
Beste ezusteko handi bat izan zan aktoresarik onenaren saria Marie-Josee Crozeri emon izana; izan be, kritikariek Denys Arcand zuzendariaren 'Les Invasions Barbares' filmaren aktore zerrendako beste edonor modura ikusi dabe aktoresa honen jarduna. Saria sano ezusteko handia izan zan; horren erakusgarri argia Marie-Josee Croze agertu ez izana sariak jasoteko ekitaldira. Gidoirik onenari emondako saria, ostera, askoz hobeto aurreikusi eben kritikariek. Azken film honi emon eutsien eta zuzendariak berak jaso eban, bera izan zan-eta komedia honen testuaren idazlea.
Aktorerik onenarentzako saria zozketa guztien barruan sartzen ziran Mehmet Emin Toprak eta Muzaffer Ozdemir aktoreentzat izan ziran; biak Turkiako 'Uzak' filmeko protagonistak izan dira. Nuri Bilge Ceylan zuzendari turkiarrak egindako pelikulea emon zan egunetik bertatik faborito lez agertu da sari garrantzitsuren bat eskuratzeko. Era berean, Samira Makhmalbaf-ek, jaialdi honetako ohiko partaideak, Epaimahaiaren Saria eskuratu eban 'A Cinq heures de l'après midi¡ filmagaitik. Wim Wenders-ek eta Jeanne Moreau-k urregorrizko kamerea emon eutsien Christoffer Boe-ren 'Reconstruction' izeneko pelikuleari.
Zertzelada tristeen artean, aitatzekoa da Jean Yanne aktore, zuzendari, produktore eta konposatzailearen heriotzea, hilaren 23an jazotakoa. Gilles Jacobek, zinemaldiko zuzendariak, bere adiskidea gogora ekarri gura izan eban, bat-bateko omenaldi hori guztiz kanpo egoala azpimarratuz. Jazoera latz hau alde batera lagata, Cannes-ek amaierea emon eutson zinemaldiari, Charles Chaplin maisuaren 'Sasoi Modernoak' filmaren emonaldia opetsiz.