'Dzanga geurera'

Iñigito (Txapelpunk): 'Jente guztia konbidau gura dot maiatzaren 18an Lekeitiora hurreratu daiten; aurten, gainera, Ibilaldia munduko lekurik politenean ospatuko da...'

'Bla, bla, bla, bla, bla. Stop' Txapelpunk taldearen 2. diskoa.

Iñigito Txapel Etsaiak taldean ezagutu genduan baina azken bolada honetan buru belarri dabil Txapelpunk proiektuan; honezkero, bigarren diskoa eta bere doinuak Euskal Herritik kanpo be entzun dira zuzenean, berbarako Kuban. Labur-labur baino ez bada be, diskoaren gaineko kontu batzuk jakin guran, Iñigitorengana jo dogu.

1. Azken boladan geratu barik zabilz. 'Bla, bla, bla, bla, bla. Stop' bigarren diskoa asko kostata azkenean kalean dago eta jentearen erantzuna sekulakoa izan da baita Kuban be ezta?

Disko guztiak asko kostata ataraten dira eta momentuaren arabera gauzak era batera edo bestera joaten dira. Hori bai, jentearen erantzuna itzela izan da eta web orrian kritika gitxi batzuekaz batera, berba eta eretxi onak jaso doguz. Kubako esperientzia be zoragarria; han jentea rock gose handiagaz dago eta eszenatokiaren aurreko guztia gainezka egoala eta, jentea teilatuetan be ikustea ederra izan zan.

2. Diskoa familiari eta lagunei eskaini deutsezu. Zergaitik?

Familia eta lagunak beti izaten dodaz nire inguruan, sekulako ekarpena egiten deustie. Txapelpunk ez gara eszenatokira igoten garanak bakarrik, inguruko guztiak be kontuan hartzekoak dira. Lekeitioko Gazteak taldeari be eskerrik beroenak emon behar deutsedaz.

3. Baxua, kitarrak, ahotsak, koruak, musikea... dana egin dozu disko honetan. Gizon-orkestra bihurtu zara?

Gizon-orkestra ez baina tresna bakotxagaz badakit zeozer egiten eta taldeko kideak lanpetuta ibili diranez, neuk egin dot ahal izan dodan guztia. Emoitzeagaz pozik geratu gara danok.

4. Etsaiak taldearen esperientziaren ondoren, bakarkako 2. diskoa punk eta rock doinuez ganezka. Punkaren eta rockaren susperraldia bizi dogula pentsetan dozu?

Euskal musikagintzan, azken hamarkadan edo hutsunea egon da punk musikeari jagokonez. Kontua da ze rocka eta punka beti egon dirala hor eta azken aldian RIP eta beste talde batzuen berrindartzeagaz susperraldia etorri da, danon onerako pentsetan dot.

5. Kontzertuetara joateko joera edo ohiturea makaldu dan unean, zuk zeuk ez dozu krisirik igarri?

Bai, igarten da aitatzen dozun makaltze hori eta leitekena da horren arrazoia talde barri asko sortu dirala izatea; eskaintza asko zabaldu da, musika estilo barriak sortu eta lehen indar handiegirik ez eben beste batzuk suspertu dira eta jentearen gustoak be ez dira orain 10 urtekoak. Dana dala, oro har, musikea eta kontzertuetara joateko beheranzko jokera hori pentsetan dot ez dala arduratzeko modukoa.

6. Bideoklip bat grabau dozue eta uda ostean barriro atzerrira joango zara. Hurrengo diskoa preparetako astirik be ez dozu izango?

Bideoklipa eta diskoa hor dagoz eta proiektu barriak be bai. Udan barriro Kubara joateko asmoagaz gabilz Banda Bassotigaz batera; guztiorregaz oso lanpetuta nabil eta disko barriaren gainean ezin deutsut ezer aurreratu.

Bizkaie!