Musikea  II. urtea // 22. zenbakia - 2003ko martiaren 15a

Bilbo Hiria XV. Pop-Rock Lehiaketea (zezeilaren 27tik bagilaren 12ra)

Aurten 1252 taldek emon dabe izena, igaz baino 200 gehiagok

Martiaren bigarren hamabostaldi honetan, Bilboko udalak urtero antolatzen dauen pop-rock lehiaketea martxan dago. Aurten hamabosgarren edizinoa da eta hori ez da gitxi holako ekimenek irauten dabena kontuan hartuta. Lehiaketa honek urteak pasauta gero eta oihartzun handiagoa sortarazo dau talde hasibarrien artean.

Salbuespenak salbuespen, musikariek ez ditue era honetako lehiaketeak lar ondo hartzen, alde batetik hau baino mundu erlatiboagorik ez dagoalako eta, bestetik, musikea ez dalako kirola, marka onena lortzen dauenak dominea jasoteko. Halan da be, bitxikeria honeek alde batera itxita autortu behar da euskal musikan, azken hamabost urteotan behintzat, lehiaketak talde askorentzat tresna ederra izan dirala jentaurrean burua ezagutzera emoteko; ganera, kasu askotan zuzenean lehenengoz joteko aukerea emon deutse lehiaketeak. Bilbokoa ez da bakarra, hor dagoz Euskadi Gazteak antolatzen dauena edo Euskal Kantu Txapelketea besteak beste.

Bilboko zitan behintzat, taldeek baldintza tekniko duinak izaten ditue zuzenean joteko. Bitxia da batez be kanpotik datozen taldeakaz berba egiten dozunean, hemen eskaintzen deutsiezan baldintza teknikoak zelan goraipatzen dituen. Egia da kanpoko hainbat lekutatik ibilita, nahiko alde handia dagoala hemen ohikoak diran baldintza teknikoen eta hortik topetan dozuzanen artean eta, horregaitik eta beste arrazoi batzuengaitik, emoten dau kanpoko taldeak konturatu dirala horretaz ze aurten oso oker ez banago aurreko edizinoetako marka guztiak txiki geratu dira; Euskal Herritik kanpoko taldeak asko izan dira: Alemaniako taldeak (52), Herbeheretakoak (32), Frantziakoak (32) Belgikakoak (31), Norvegiakoak (16), Argentinakoak (2)...; bitxikeria legez, aurten Venezuela, Argentina, Finlandia eta Feroe Ugarteko taldeek be izena emon dabe lehiaketan parte hartzeko.

Honek guztionek ez dau bakarrik musikarien alde egiten, kontzertuak ikustea gustoko dabenentzat be ezinbesteko hitzordu bihurtu da Bilboko pop-rock lehiaketa hau eta hori argi geratu da orain arte egin diran jardunaldietan ze entzuleen erantzuna ezin hobea izan da. Ganera, ni lako kuriosoentzat behintzat, urtero hiru hilebetez musika eskaintza barria eta doban izatea plazer eta luxu handia da. Orain falta da ekimen honeek lehiaketetatik kanpo ataratea eta kontzertuak antolatzen dituen progamadoreak ausardiagaz jokatzea oso ezagunak ez diran taldeak ezelako bildur barik aukeratzeko; kontua da ze horrek ez dauela ezertarako balio jenteak ez badau behar bezela erantzuten, eta hori gure esku, danon esku dago.

Ondo gogoratzen dot zelakoa izan zan nire parte hartzea lehiaketa honetan. Ez dakit zenbagarren edizinoan izango zan, baina aurretik hainbat urtetan ikusle legez egondakoa nintzan eta gehienetan aretoa ganezka egoala gogoan daukat. Guztiz ezezagunak ziran taldeen aurrean egoan ikusmina sekulakoa begitantzen jatan eta gure txandea heldu zanean be holan izan zan. Hiru talde igon ginan taula gainera, Kataluniako Afraid To Speak in Public, Portugaleteko talde bat eta gu. Orduan taldeek prentsaren aurreko aurkezpen moduan hartzen zituen holako kontzertuak. Gutariko batzuk argazkilari bat aurrean ikusten genduan lehenengo aldia zan eta pentsau eizue urduritasuna zelakoa izango zan. Zorionez, saria be irabazi genduan baina kontzertu haretan gure lorpenik handiena jenteak gu ezagutzea eta gutaz berba egiten hastea izan zan.

Zoritxarrez, antolatzaileen ausardia falteagaitik eta publikoaren erantzun ezagaitik gaur egun ez dago hori lortzeko horrenbeste aukerarik eta, alde horretatik, bakarrenetarikoa da lehiaketa hau; esango neuke holako lehiaketetan parte hartzea ia ezinbestekoa izaten dala hasten dagoan talde batentzat.

Gomutak baztertuta, aurten 1252 eskaintza inguru jaso dira eta horreetatik 58k baino ez dabe lortu Bilborock aretoan zuzenean joteko txartela.

Lehiaketan hiru atal dagoz: pop-rocka, metala eta joera barriak. Gehienek pop-rock atalean emon dabe izena: 881 taldek; metal atalean, barriz, 294 taldek eta joera barrien barruan, 77 taldek.

Sariei jagokenez, pop-rock atalean lehenengoak 6000 euro jasoko ditu, bigarrenak 4000, hirugarrenak 3000, laugarrenak 2000 eta bosgarrenak 1000.

Metal atalean, hiru talde izango dira sarituak: lehenengoak 6000 euro, bigarrenak 4000 eta hirugarrenak 2000 euro jasoko ditue.

Azkenik, sari gitxien joera barrietan izango da: lehenengoarentzat 4000 euro eta bigarrenarentzat 2000 euro.