Txapel bete bertso

Trankil. Ez gatoz beste txapelketa baten kontuekaz. Ezta antzik be. Bizkaiko bertsolari gazteek plazan kantetako daben aukera eskasiari aurre egiteko ekimena da. Txapel Bete Bertso. Bertsolari gazteek eurek topau deutsie arazoari urtenbidea.

Ezaguna da plaza urritasunaren arazoa. Bertsolari gazte asko urten da azken urteotan, maila ona eta batez be gogoa erakutsi dauena, baina merkatuak bere legeak ditu eta ezin deutse guztiei leku egin. Eta Euskaldunako finalean ikusi genduan gazteak maila onean datozela eten barik. Aspaldiko ardurea bada be, arazoari aurre egiteko besteko ekimen gitxi izan dira. Mungiako Taket bertsolaritza alkartearena izan leiteke erreferentzia ia bakarra. 2000 urtean hasita, hilero gazteen saioa antolatu dabe Kos tabernan, formato txikian, hainbat eta hainbat bertsolariri jentaurrean kantetako aukerea eskainiz.

Oraingoan barriz, bertsolari gazte batzuk Bizkaiko eskualde guztietan zabalduko dan ekimena antolatu dabe. Herrietako taberna, txoko eta kulturguneetan izango dira saioak, gehienbat plazetan ohikoak ez diran bertsolari gazteak kantauko dabe eta saio amaieran txapela pasauko da entzuleen artean, bertan batutakoa izango da-ta bertsolarien jornala.

Bertsolariak antolatzaile, antolatzaileak bertsolari. Ekimenak Bizkaiko Bertsozale Alkartearen babesa eta laguntzinoa dauka, baina egia esan polita da gazteak eurak zelan mobidu diran ekimena aurrera atarateko. Konturatu dira kantau gura badabe euren aldetik be ahalegin bat eskatzen dauela horrek; dagozan aukerak aztertu eta eskura dagozan baliabideak erabili, helburu bategaz: jentaurrean kantau gura dauen gazteari aukera hori eskaintzea. Eskualde guztietako bertsolariak hartuko dabe parte eta ez dabe kobrauko, aitatu moduan txapela pasauko da saioa amaitutakoan eta han batutakoa banatuko da bertsolarien artean.

Gorka Lazkano eta Fredi Paia dira ekimenaren sustatzaileak. Bere inguruan taldea osotu dabe eskualde bakotxeko ardurea hartuko daben bertsolari gazteakaz eta honeek, katea luzatuz, tokian tokiko antolakuntzarako laguntzinoa topau dabe bertso-eskola, taberna eta bestelakoetan. Azkenerako jente piloa da ekimenean inpliketan dagoana, bere arrakastea ziurtatzeko lehen oinarria.

Zuloak be ikusi deutsaguz Txapel Bete Bertsori. Hirurogeita piku bertsolari batu dira. Gehiegitxo aukeran. Helburua ohiko bideetatik plazara urteteko aukerarik ez dauen bertsolari gazteari ateak zabaltzea bada, eta badago bertsolari gazte mordoa baldintza hori beteten dauena, ez dogu uste honeek Euskaldunako finalean kantau ebenentzako saioak diranik, bertan beste maila bateko bertsolariak hartu behar dabelako protagonismo osoa. Eta ez dinogu finalistek plaza nahikoa dabenik, baina horrek beste era bateko saioak eskatzen ditu. Bestetik, gazte-txartela erabilteko eskubidea aspalditxo galdu dauen askotxu be ikusten dogu izenen artean, euren gaztetasuna dudan ipini barik, ekimen honetan gazteagoari leku egiten jakin beharko leukena. Dana dala, antolatzaileek ez ditue erispideak guztiz zehaztu, ateak zabalik idagoz, eta hori izan leiteke hasteko modu ona, bidean gogoeta egin eta hobetu beharrekoa hobetzeko.

Urtarrilean hasi eta bagilera arte luzatuko da ekimena. Oraingoz urtarrileko eta zezeileko programea osotu dabe. Hilean hamalau saio, beste horrenbeste herri edo auzotan. Urtarrilaren 10ean izan ziran lehenengo biak Algortan eta Zeanurin. Honeek dira urtarrilean zehar bertsolari gazteak entzuteko aukera emongo deuskuen saioak: