Cano, Gabiria, Montoia eta Olasagarre dira Euskadi Literatura Sarietako euskerazko finalistak
Bizkaie!
Euskadi Literatura Sarietako euskerazko, gaztelaniazko, itzulpengintzako eta haur eta gazte literaturako epaimahaiek finalistak aukeratu dabez. Finalista horreen artean aukeratuko dira aurtengo Euskadi Literatura Sariak. Erabagia urrian zehar hartu eta jakinarazoko da, eta sari banaketa zemendian egingo da, aurten hilaren 22an, Eusko Jaurlaritzako Kultura Saileko iturriek jakinarazo dabenez.
Kontuak kontu, euskerazko modalidadean, Harkaitz Cano ('Belarraren ahoa'), Julen Gabiria ('Han goitik itsasoa ikusten da'), Xabier Montoia ('Blackout') eta Juanjo Olasagarre ('Ezinezko maletak') dira finalistak.
Gaztelaniazko literatureari zuzendutako 2005eko Euskadi Sariaren finalistak honakoak dira: José Fernández de la Sota ('Material de construcción'); Raul Guerra Garrido ('La Gran Vía es New York'); Pinilla Ramiro ('Verdes valles, rojas colinas'); José Ramón Recalde ('Fe de vida'); Miguel Sánchez-Ostiz ('Liquidación por derribo: diarios, 1999-2000'); eta Pedro Ugarte ('Casi inocentes').
Bestalde, Itzulpegintzako modalitatean, Oscar Arana (J.M. Coetzee-n 'Lotsaizuna'), Josan Elosegi (Marie Darrieussecq-en 'Abardikeriak'), Julen Gabiria (James Matthew Barrie-ren 'Peter Pan'), Juan Kruz Igerabide (Hiner Saleem-en 'Nire aitaren fusila') eta Karlos Zabala (Emile Zolaren 'Parisen sabela') dira finalistak.
Azkenik, Haur eta Gazte literaturako finalistak ondokoak dira: Javi Cillero ('Esne katilu batean ezkutatu egiten zen neska'); Arantxa Iturbe ('Bi ipotx gure etxeko sofan'); Xabier Olaso ('Pupuan trapea'); Kirmen Uribe ('Garmendia errege'); eta Patxi Zubizarreta ('Atxiki sekretua. Sorginen eskuliburua').
Euskadi Literatura Sariak 1982tik emoten dira eta aurtengoa bederatzigarren aldia da egungo oinarriakaz erabagiten dana, hau da, argitaratutako lanei zuzenduta, literatur generotan bereizkeriarik egin barik, haur eta gazte literatura eta itzulpegintzara zuzendutako sari berezituakaz eta kanpo-zabalpena bultzatuz.