'Zure rokanrrola', 7 lurraldeetako 22 taldek Gure Irratiaren alde atara daben diskoa
'Zure rokanrrola' diskoko taldeak eta kantuak:
- Nuuk-At: Arezko itsasoa.
- Dirties: Samurai.
- Sextysexers: Askatu jarrera.
- Potemkin: Kotoizko itsasoa.
- Surfin kaos: Bidearen bazterretik.
- Brigada criminal: Inoiz gehiago ez.
- Captain Nemo: 21 aulkiak.
- Lehiotikan: Zaharkituriko fedea.
- Stupenda Jones: Paradisu faltsua.
- Keike: Errudun jaioak.
- Izate: Ametsa.
- Fjord: Destinuaren eskutan.
- PiLT: Oroimenaren zuloa.
- Ikus: Kali.
- Sharon Stoner: Burmuina eta bihotzaren arteko eztabaida.
- Neubat: Gure hitzak.
- Izaera: Infernuko Patxi.
- Sorkun: Hator.
- Skunk: ...Ta lurra itzulika.
- Ozke: Xake.
Bizkaie!
Lapurdiko irratiaren egoera ekonomiko baltzaren aurrean, Euskal Herriko zazpi lurraldeetako 22 taldek abesti bana sortu eta ‘Zure rokanrrola’ diskoa atara dabe Gure Irratiaren alde. Lapurdiko irratiak dirua biltzeko kanpainea abiarazo dau Baionatik Uztaritzera, egoitzea lekuz aldatu ahal izateko.
'Kalea eta gizartea politikarien aurretik agertu da, eta, dirurik tartean ez dala, 22 taldek kantu barriak sortu dabez Gure Irratiaren alde', adierazo eban diskoaren kudeaketa artistikoaren arduradun Galder Izagirrek, Donostian eginiko jentaurreko aurkezpenean. ‘Honako hau proiektu ederra da eta gagozan egoeran holakoen babesa beharrezkoa dogu’, adierazo eban Iñaki Etxelekuk, Gure Irratiaren izenean. Proiektuaren maminaren barri emoteko diskoaren arduradunen esanetan, ‘Kostaldetik Erriberara eta Sakanatik Pirinioetara, Rokanrrola harri birakarien (The Rolling Stones) gisara ulertuta, geratzen ez dan harria, geratzen ez dan herria bilakatu nahi izan dogu’. Gauzak holan dirala, ekimenen parte hartu daben taldeek kantuak alkartasuna abiapuntutzat hartuta sortu dabez, danak euskeraz.
Diskoa salgai dago daborduko eta diskoa aurkezteko kontzertu batzuk egiteko asmoa be azaldu dabe nahiz eta jakin 22 taldeak batzea ia ezinezkoa izango dala. Horrezaz ganera, Gure Irratiak datozen hilebeteetan herritarrei begira ekimen gehiago antolatuko dituala iragarri dau Iñaki Etxelekuk; berbarako, udagoienean Miarritzen Ipar Euskal Herriko kantariakaz irratiaren historia antzeztuz ikuskizun berezia antolatzen dabiz.