Bertsotan  I. urtea // 12. zenbakia - 2002ko urriaren 15a - Hamaboskaria

Udegoiena heldu de


Udegoiena heldu de

1
Udegoiena heldu de
udegoiena heldu de,
dekonak gehiago gure;
lokotzak zabaldu dire
batu gaztainak sakure.
Dekonak gehiago gure,
batu gaztainak sakure.

2
Zeru ertzak gorri-gorri
zeru ertzak gorri-gorri,
intxaurrondoak lau orri.
Ai ene! maite politak
mosuek deustaz igorri.
Intxaurrondoak lau orri,
mosuek deustaz igorri.

3
Etxondoan gori-gori etxondoan gori-gori,
txutxu mutxuke atso bi,
narrue kenduko deutse
fulana ta benganori.
Txutxu mutxuke atso bi, fulana ta benganori.

4
Sabaien azpigarrie
sabaien azpigarrie,
hamar arroba txarrie;
gatzunaskan negurako
urdie ta giharrie.
Hamar arroba txarrie,
urdie ta giherrie.

5
Tximinipien txingarra tximinipien txingarra;
goruen amama zaharra.
Azpiren orie eta
kapatz azpien sagarra.
Goruen amama zaharra,
kapatz azpien sagarra.

6
Aza orrien opile
aza orrien opile,
taloa ta morokile.
Handie egingo jaku
gure etxeko mutile.
Taloa ta morokile,
gure etxeko mutile.

7
Pil-pil sagardau kupela
pil-pil sagardau kupela, txistuke haize epela.
Negue ganera dator
bakotxak zaindu txapela.
Txistuke haize epela,
bakotxak zaindu txapela.

8
Laratzien tirri-tarra
laratzien tirri-tarra,
dantzari tanbolin zaharra.
Aittittek aldien deko
aste guztiko bizarra.
Dantzari tanbolin zaharra,
aste guztiko bizarra.

9
Bazagoz bere begire
bazagoz bere begire,
ez etorri aparire.
Kopletan nenbilen arte gaztainak erre ein dire.
Ez etorri aparire,
gaztainak erre ein dire.

10
Hamentxe agurtzen gara
hementxe agurtzen gara;
ezkongai dekot alaba.
Konfesatute etorri
interesaturik bada.
Ezkongai dekot alaba,
interesaturik bada.

Moises Enbeita

Udagoiena heldu da, bai. Eta probetxurik atara deutsanik bada. Udagoienari koplak jarri eta ganera saria irabazi. Ez da plan txarra. Eta koplak haizeak eroan ez daizan, gure atalera ekarri doguz, baserri inguruko udagoienaren barri emon daien.

Moises Enbeita da koplen egilea eta Jentilak V. kopla-paper lehiaketan lehenengo saria irabazi eban sorta honegaz. Berrogeita hamazazpi urteko muxikarra, Enbeitatarren baratzeko bertsolaria, bat-batean Bizkaiko txapelketa ugaritan parte hartua, bertso jarrietarako be upealako zaletasuna erakutsi izan dau beti. Okasino berezietarako askotan idatzi izan ditu bertsoak Moisesek. Nire eskuetatik pasau eta gogoan dodazanak, Urriko Azken Astelehenerako sortutakoak, Bizkaiko Bertsozale Alkartearen Durangoko egoitzearen inaugurazinoan kantautakoak edo Alkarteko zuzendaritzakideok Errioxara egindako bidaian banatutakoak. Umorez betetako bertsoak beti. Lehiaketetan be ohiko jartzailea da eta datu zehatzik ez badaukat be, seguru nago Bizkaian azken hamarkadan antolatutako sariketa guztietan sariren bat lortua dala. Azkena aurreko udan. Jentilen kopla-paper lehiaketan helduen ataleko lehenengo saria irabazi eban sorta honegaz.

Jentilak kopla-paper lehiaketea Arratiako Bertso-Eskoleak antolatzen dau. Antolatzaileen esanetan, Arratia mailan koplagintzeak dauen izaera propioa eta berezia da kopla-paperen lehiaketea egitearen arrazoia. Arratiako bazterretan tradizino handikoak izan dira eskeko zein dantza giroko koplak eta bertoko bertso-eskoleak koplagintzeari bultzadea emon gura deutso. Aurten seigarren edizinoa bete dau Jentilak izeneko lehiaketeak eta hona ekarri doguz lehen saria jaso daben koplak, Moises Enbeitak jarriak eta porrusalda doinuz kantau leitekezanak.

Labur-labur

Bizkaiko Bertsolari Txapelketea 2002

Ondarroako kanporaketea (III) // 2002ko urriaren 13an

Beñat Gaztelurrutia izan genduan jaun eta jabe baina oro har saio eskasa izan zan. Gaztelurrutiak 312 puntu lortu zituan eta oraingoz sailkapen nagusiko lehen postuan dagoan Gorka Ostolazak 344,5 ditu. Ezustean, Joseba Gojenola txapelketatik kanpo geratu da.

Amorotoko kanporaketea (IV) // 2002ko urriaren 19an, Frontoian arratsaldeko 17:30etan.

Beñat Ugartetxea, Jabier Olibares, Iker Belaustegi, Peru Madalena, Jon Eizmendi eta Matxalen Zabaljauregi.

Iñaki Aurrekoetxea