AG
Iñaki Aurrekoetxea
Apirilaren hamazazpia
ate joka daborduko
Euskal Erdiko hauteskundeez
ez gara errez ahaztuko
mitinak, zinak eta ezinak
gehiengoa nork lortuko
nik tripetatik egin behar dot
goraka hasi orduko.
Aurtengo zita dala dinoe
garrantzitsua benetan
gure berbea ta erabagia
jokoan dagoz honetan
eta lehenengo musturrekoa
hasi orduko berbetan
kanpaina bera non hasiko ta
Espainiaren ezpainetan.
Herri ekimen barria martxan
pozik ikusi genduan
baina AGri AG gustau ez
ta ezeztatu segiduan
esan ez dauan horretan dago
pekatua deskuiduan
esan ez dauan horretan baino
esan ez dauan moduan.
AGk ez ei dau ETA kondenau
hemen hori ei da gako
neuk be ez dot ba kondenau behar
(txartela kartzelarako?)
nire kondena, besteak beste,
Ibarretxek listo asko
AGri emon babesa baino
hutsalagoa dalako.
Juan Jose guapo atara dabe
ikusi dogu guztiok
ta “Elkarrekin egingo dugu”
dinoe pankartatzarrok
barku erdiko erdi kapitain
nigaz sikeran jai dekok
higaz ez joat ezer egingo
ausartago egiten ezpok.
Legebiltzarra izango ei da
guztiz demokratikoa
aiko Errazti andrEAk barriz
zentzunari ostikoa
zuek dominau eizue zuen
botere folklorikoa
baina mesedez demokraziaz
ez pintau zuen zirkoa.
Ez EAJk, ezta EAk be
EHAKek bai ausardia
barri on baten esperantza be
galduta genduan ia
bide polita izan daiteke
ta litzateke handia
balitz ezkertiar ta abertzale
guztion batukaria.
Gurari bati bide eginaz
bego sorta amaituta
PPren pupak, Patxiren txipa...
ahaztu izana onartuta
min egin barik pasau daigula
hauteskundeen disputa
bakea eta herria egiten
lan dezente daukagu ta.