Gabonetako erregina
Goazen ba, edari mueta honen ganean aholku txiki batzuk emotera:
- Cava botila bat zabaltzerakoan, kontu handia euki behar dogu. Kortxoa ataraterakoan ez dogu ezelako zaratarik egin behar. Beste alde batetik, astiro-astiro zabalduko dogu, mobimentu gogorrik egin barik. Ardaoak urten ez dagian, 45 gradu inguru okertuko dogu botilea.
- Kopeak garrantzi handia dauka ardao apardunak edateko. Kopea flauta muetakoa izatea komeni da, hau da, luzea eta gardena. Luzea izateak garrantzi berezia izango dau, holan arrosarioa (ardao apardunetan, kopearen beheko aldetik gorantz sortzen dan burbuila-katea) hobeto ikusiko dogu eta. Kalidadeko cavek, burbuila txikiak eta finak euki behar dabez, eta zenbat eta gehiago euki, orduan eta kalidade hobeko cavea izango da. Etxeko armairuan gordeta daukaguzan antxinako kopa txiki eta zabal horreek baztertu egin beharko doguz eta kopa luzeak erabili, cavek izaten daben arrosarioa ondo ikusi gura badogu behintzat.
- Ez da izaten aproposa ardao mueta honeek bazkari edo afari amaieran edatea, normalean tripea beteta eukiten dogulako eta cavek daukien karbonikoak kalte egin ahal deuskulako. Ardao apardunak mueta guztietako janariakaz ondo buztartu leitekezan bakarrak dira. Beste alde batetik, ardao honeek urteko sasoi desbardinetan edan daitekez, ez bakarrik gabonetan eta ospakizunetan.
- Kontu handia izan behar dogu cavea erosterakoan. Jakingo dozuen legez, ardao mueta honeek denporeagaz galdu egiten dira. Saltzaileari botileari lepo noiz egin jakon galdetu beharko deutsagu (lepo egitea kortxoa kentzea eta gas karbonikoaren presinoagaz botilearen lepoan dagozan sedimentuak kentzea da). Cavak hainbat arinen edan behar dira, bestela freskotasuna eta karbonikoa galdu egiten dabelako. Kortxoan ikusi geinke ardao aparduna freskoa dan ala ez. Kortxoa kentzen dogunean zabaldu egiten bada, botilan denpora gitxi pasau daualako izango da eta hau seinale ona da. Baina kortxoa kendu eta txanpiñoi etxurea hartzen badau, seinale txarra izango da, kortxoak botilan denpora larregi pasau dauanaren seinale.
- Cavearen tenperaturea be sano garrantzitsua da. Tenperatura aproposa 6º-8º bitartekoa da. Tenperatura hau mantentzeko, derrigorrez erabili beharko dogu izotzontzia, eta bertan ura botako dogu, baita izotz kopuru handia be.
- Daukien azukera kopuruaren arabera, caven honako sailkapen hau egin geinke: aperitiboetarako eta jatorduetarako Brut Nature eta Brut cavea edango dogu. Postreakaz eta jateko gozoakaz, cava sikua eta edo erdisikua edango dogu.
Gurako neuke aholku txiki honeek zeozertarako balio izatea. Ondo pasau gabonak eta kontuz gehiegikeriakaz.
Mikel Garaizabal,
enologoa eta sommelierra
Gabonak hortxe bueltan dagoz. Ez dot gogoratu egutegiko orriak kendu dodazalako, ez, komunikabideetan gero eta janari eta ardao iragarki gehiago ikusten dodazalako baino. Halan da be, gaur ez dot honen ganean idatzi gura; gaur, gabonetan eta euskal mahai guztietan erregina dan edari baten inguruan idatzi gura dot: ardao apardunak, eta honeen artean garrantzitsuenetakoa, cavea. Eta kontuz! Ez dot Champagne berbea erabilten, izan be, izen hau Frantziako Champagne lurraldean egiten dan ardao apardunari bakarrik emoten jako.
Cava Jatorri Deitureak Arabako, Errioxako, Nafarroako, Zaragozako, Badajozeko, Valentziako eta Kataluniako 159 herri batu arren, produkzinoaren % 99 Katalunian egiten da, Penedes inguruan hain zuzen be. Ganera, ezelako arazorik barik esan geinke Euskal Herriko 5 herritan cava egiten dan arren (Arabako Moreta, Guardian, Oionen, Bianan eta Mendavian), Kataluniarrak dirala jaun eta jaube kalidadeko cavak egiten.