Sesamo-teilak

Osogaiak:

 100 gr. gurin.
 100 gr. azukera.
 100 gr. arrautza zuringo.
 100 gr. urun.
 Sesamo-aleak.

Zelan egin:

Aitatutako ordena berean nahastauko doguz osogaiak, gurina, azukerea, arrautzen zuringoak, uruna eta sesamo-aleak.

Hasteko, lapiko baten jarriko dogu gurina, eta espatula bategaz eragingo dogu, ‘pomada’ puntuan jarri arte. Ostean, gurina puntuan daukagula, azukerea ganeratuko deutsagu, astiro-astiro, eta bitartean guk mobiduten segiduko dogu, bolatxurik urten ez dagian. Hurrengo pausua arrautza zuringoa gehitzea da, eta dana batera bota ahal dogu gurinaren eta azukerearen ganera. Ostean, eragin egingo deutsagu, indarragaz, ondo nahastau arte. Gero, astiro, uruna botako dogu, beti be bueltak emoteari itxi barik, dana ore trinko bat egin arte. Azkenik, gura dogun sesamo kantidadea nahastauko deutsagu, eta ore guztia hozkailuan itxiko dogu, ondo hotzitu arte.

Hurrengo pausua galletea egostea izango da. Horretarako, labea 170ºtan jarriko dogu. Bitartean, labeko plaka baten (hotz dagoala) ‘papel cebolla’ deitzen doguna heldulekuan jarri eta plakan, koilara baten atzeko aldeagaz, 10 zentimetroko diametrodun biribilak egingo doguz oreagaz, 2 milimetrodun lodiereagaz gitxi gorabehera. Honeek lauzpabost minututan egosiko doguz laban. Denpora hau labearen araberakoa izango da.

Azkenik, labatik atara eta berotan, espatula bategaz egositako galletak hartu eta ardao botila baten ganean jarriko doguz, hotzitu arte, teila formea hartzen daben bitartean. Laster, jateko prest egongo dira. On egin!

Beñat Ormaetxea,
Aretxondo Jatetxeko sukaldaria