Makailao eta onddo laminak, pil-pil saltseagaz
Esan dogunez, plater hau epel jatekoa da, holan atarako deutsagu eta makailaoari etekinik handiena; azken buruan, gogoan hartzeko beste kontu bat: pil-pil saltseak ez dau irakin behar, bestela ebagi egingo dalako; zuhur ibili beraz. On egin.
Beñat Ormaetxea,
Aretxondo Jatetxeko Sukaldaria
Kaixo irakurleok: oraingoan makailaoa eta onddoak lehengaitzat hartu eta beharrean hasiko gara. Errezeta honetarako makailaoaren alde sendoa, solomoa edo bizkarra erabiliko dogu. Onddoak, barriz, oso-osorik hartzea komeniduko da, eta freskoak badira hobeto. Hasikerako kontu gehiago barik, hasi gaitezan arrain plater hau preparetan.
Makailao eta onddo laminak, pil-pil saltseagaz
Osogaiak:
- B makailao bizkar (aurreko aldea baino ez).
- Oliba-orioa.
- Berakatza.
- Pipermin ale bat.
- 200 gr. onddo.
- 200 gr. makailao azal.
- Perejila.
Zelan egin:
Behin onddoak garbi-garbi egin ondoren, kazola baten jarri, oliba-orioz estaldu eta su txikian ordu betean eukiko doguz pol-pol irakiten dagozala. Gitxi gorabehera ordubete pasauta, oriotatik atara eta laminetan ebagiko doguz onddoak, eta geroagorako plater baten itxi.
Makailaoa, ostera, onddoakaz erabilitako orio berberean egosiko dogu. Orioa bero-bero dagoanean, hau da, 100º C gradu inguruan, makailaoa bertan sartu eta lau minututan euki behar da, gehiago ez. Ondoren, oriotatik atara eta hotzitzen itxiko dogu. Makailaoa epel dagoanean, laminetan zatitzea izango da hurrengo pausua; behar hau kontu handiz egin behar da, makailaoaren mamina desegin ez daiten. Laminak eginda daukaguzanean, onddoakaz egindako moduan, makailaoa be plater baten gordeko dogu.
Ahalik eta arinen, pil-pil saltsea egiten hasiko gara, eta horretarako onddo eta makailaoagaz erabilitako orio berbera erabiliko dogu. Kazolan makailao azalak, berakatza eta pipermin edo gindila alea jarriko doguz su motelean, makailao azalek gelatinea eta euren ura askatu dabela ikusi arte. Jarraian azalak, berakatza eta pipermina iragazi eta egurrezko makilatxu bat erabiliz, geldiro-geldiro baina etenik barik eragiteari ekingo deutsagu, harik eta pil-pil saltsea atara arte.
Kontuak kontu, prozesua ia-ia amaituta egongo da; badaukaguz ba onddoa prest, makailaoa eta pil-pil saltsea be bai eta, beraz, platera preparetea baino ez jaku falta. Itxura ederragoa emon gura badeutsazue plater handiak aukeratu eta goitik behera jarri behar dira makailao laminak, batean makailaoa eta bestean onddoa, era horretara, lau lagunentzako beste jateko ipini arte. Plateretan guztia behar dan moduan ipinita daukagunean, laban sartuko dogu hotz-hotz barik epel-epel atarateko mahaira; dana dala, kontu handiz ibiliko gara, ze makailaoa eta onddoak ondo eginda egongo dira, eta azken pausu horretan su larregi emon ezkero edo surtan denpora larregi euki ezkero, makailaoa sikatzeko eta onddoak erreteko eta hondatzeko arriskua dago. Labatik atara eta pil-pil saltseagaz estaldu.