Bertso-eskolako irakasleari, bihotzez
Bizkaiko Txapelketea
Motorra prest dauka 2004ko Bizkaiko Bertsolari Txapelketak. Bizkaiko Bertsozale Elkarteak urriaren 8an emongo dau prentsaurrekoa txapelketearen nondik norakoak azaltzeko. Badakigu datorren domekan hasiko dirala kanporaketak. Munitibarko frontoian jokatu da lehenengoa, urriaren 10ean, arratsaldeko 17:30etan. Bertan honeek bertsolariak kantauko dabe: Arkaitz Ugartetxeak, Xabier Enbeitak, Garikoitz Sarriugartek, Urtzi Urrutikoetxeak, Ander Salaberriak eta Jokin Castañosek. Aurkezle lanak Josu Goikoetxeak beteko dauz. Bizkaiko txapelerako lehia martxan da eta Bizkaie! Aldizkarian jarraipen zabala egingo deutsagu.
Iñaki Aurrekoetxea
Aupa titxer maitea
gauzak zelan doaz?
Aprobetxau al dozu
udea ganoraz?
Nik egin dot nahikoa
parranda ta jolas
ta ikusi dozunez,
hamar bat bertsogaz,
zuk agindu ez arren
lanak egin dodaz.
Bertso-eskolan ikasturte barria hastekotan da, baina igazkoaren balantzea egin gura dauanik be bada. Joan dan irailean Arabar Errioxara bisitea egin eben bertso-eskolako irakasle eta arduradunek Bizkaiko Bertsozale Elkartearen eskutik. Bazkalosteko kopa eta kantu artean karta hau agertu zan, “Bertso-eskolako irakasleari bihotzez”, eta han batutakoek, hartzailea bera tartean egon eitekealako errezeloan, kantuz irakurteari ekin eutsien, hamalau heriotzen doinuaren intrigapean. Hamar hamarreko txikigaz ordago irakasleari. Bertso sortea, orduan, “ikasle bihozbakoa”k firmau eban.
Ikasturte barriak
laster dauka leku,
baina igazkoa ezin
gogotik baztertu.
Gure ustez egon zan
notabletik gertu,
baina zure eretxirik
ezin lei aztertu,
azken lau klaseetara
ez zinan agertu!
Urrian hartu zendun
sorpresa itzela:
mutiko bakarra ta
zortzi damisela!
Bada ikasi dozu
munduak bezela,
potroek galduala
urguilu nibela,
bertsotan neskatoak
gehiago garela.
Metodoaz zer esan,
lekutan Descartes!
Zer egin bazenkian
pozik horrenbestez.
Inprobisazinoa
ederra da berez,
baina inprobisauta,
jakin behar zendun lez,
bertsoa egin leike
baina eskola ez.
Ahalegindu zinan bai
eskola orduetan
eta ia lortu be
handia benetan.
Hileak ariketa
bakarraren bueltan,
oinez ondo ikasiak
sartu arren bertan,
ia atara ginan
barriz lau oinetan!
Gabonetatik aurre
eskolako plazan,
ofiziotarako
afizinoa zan
Temara tematuta
gaiaren peskisan,
lehenengo coitus hemen
gero interruptus han,
Bapatean guztiak
gastauko zenduzan!
Eskolartekora be
heldu ginan, karai!
Zure espektatibak
guretzako etsai.
Txapela gura zendun
gure buruan, ai,
baina ez gara Igor
ta ez gara Unai,
bertsotan ondo pasau
gura dabenak bai!
Gero sailkapena zan
eskualderako,
zu sailkatu ez eta
ni finalerako.
Holangoetan zenbat
arrazoi doako;
Kontuz, ez da irakasle
ona zarelako,
bertsotan txarra zara,
zer egingo jako!
Irakasle moduan
ez zabiz hain oker,
arean galduta bai
makina bat bider.
Elkartruke apur bat
izan ezkero zer?
Edukiak, programak
ta pare bat tailer...
Durangon Topaketak
ez al dira laster?
Hau da despedidea,
goraintzi ugari,
animoakaz ekin
kurtso barriari.
Buruari astindu,
ez etorri nagi;
halanda be gogoa
ez bada ernari,
eskatu kontsejua
bizar zuriari.