Javier Agirresarobe argazki zuzendaria, Zineko Sari Nazionala

Euskal zinearen argazkilaria

1977tik 80ko hamarkadako erdialdera arte bete-beteko konpromisoa hartu eban euskal zinematografiagaz. 1977an Imanol Uribegaz batera jardun eban “EZ” laburmetraian eta urtebete geroago Fernando Colomoren “¿Qué hace una chica como tú en un sitio como éste?” filmearen argazkiaz arduratu zan.

Sasoi honetan ostera be egin eban behar Uribegaz batera gurean guztiz ezagunak diran ondoko titulu honeetan “El proceso de Burgos”, “La fuga de Segovia” eta “La muerte de Mikel”; larogeiko hamarkadako bigarren erdialdean hainbat proiektutan hartu eban esku, berbarako Javier Rebolloren “Golfo de Vizcaya”, Montxo Armendarizen “27 horas”, Gonzalo Suárezen “Remando al viento” edo José Luis Cuerdaren “El bosque animado” pelikuletan.

Lau Goyaren irabazlea

Pilar Miróren “Beltenebros” filmagaitik argazkigintzarik onenaren Goya saria irabazi eban lehenengoz; horren ostean, Víctor Ericeren “El sol del membrillo” pelikulan hartu eban parte edo Juanma Bajo Ulloa gasteiztarraren “La madre muerta” filmean. Imanol Uriberen “Días contados” filmeko ikutu hotzetan edo Julio Medemen “Tierra” pelikulako tonu apaletan ondo be ondo jardun eban.

Modu honetara, guztiz estilo personala garatu dau eta hori agiri-agirian dago Miróren beste film bitan: “Tu nombre envenena mis sueños” eta “El perro del hortelano”; azken behar hori zala eta, bigarren Goya emon eutsien; hirugarrena eta laugarrena “Antártida” eta “Los otros” film ezagunetan egindako lanakaitik emon eutsiezan. Beraren azkenengo beharra Amenábarren “Mar adentro” filmean ikusi ahal izan dogu.

Joseba Terreros