Neure maisu ohiari, bertso barriak ekarri

Neure buru honeri
eragingo dautsat
txikitako kontuak
harturik aintzat
inportantzia dauko
detaile bakotxak
eskolako sasoiak
ez baitira hutsak
nik ez dodaz ontzat
orduko langintzak
egon nintzen behintzat
ikusita baltzak
“mustro” bat geunkalako
irakasletzat.

Bera zelangoa zan
eginik gomuta
emoten eban hartza
edo mamuta
soina ondo betea
burua hustuta
gizaseme mardoa
alperrik galduta
bera sarjentu ta
danok errekluta
bati mehatxuka
mekauenlaputa
tirano batena zan
bere konduta

Irakatsi nahi euskun
Inglesen hizkuntza
Metodoa zan baina
“boxeo” hutsa
belarritik eutsita
tiratu goruntza
zartakoz josi eta
jausi arte bultza
maisu harroputza
butu ta gorputza
beraren laguntza
zan gure gurutza
hoba eskarmentu bat
emon bageuntsa

Ezjakinak gintzan lez
ingles gorabeheran
hanka sartzen genduan
hitz-egikeran
akats bakotxagaitik
zaplada bat hegan
zitalak errukirik
ez eukan guregan
klase hasikeran
nik ez dakit zelan
baina berban-berban
jotzeko aukeran
maisu “sadiko” harek
gozatzen eban.

Nik pasa dodazanak
egiteko ihes
neure adiskideak
ondo dakiez
maisua beti neuri
itaunak eginez
zer erantzun jakin ez
eta danari “yes”
lehenengo fusilez
ostean mitinez
horrenbeste ingles
ikasi ezinez
beti amaitzen neban
buruko minez.

Irakasle alua
beti buru-begi
hutsak harrapatzeko
beren beregi
ernegatzeko dago
motibo larregi
berarentzat klasean
dana zan zilegi
mila putakeri
hainbat ikasleri
ta esaten segi:
“ixil ta obedi”
zer egin honelango
aker bateri?

“Burua” ailegatu
eta zoritxarrez
guztiok jartzen gintzan
larri bildurrez
boluntario eske
hasi ta inor ez
azkenean atara
behar derrigorrez
abusoak errez
kalteak dakarrez
hain era gogorrez
tratatu beharrez
etxera joaten gintzan
erdi negarrez

Bertsotan bota dautsat
hamaika txilio
eta beste hainbeste
bota neikio
dana ahaztu lei baina
denbora medio
atzean dago hainbat
oinaze-jario
orain horratio
ez dot arerio
baina oraindio
esango neuskio
maisu lez ez dauala
bape balio