Gorka Ostolaza Lea Artibain jaun eta jaube
Gizaburuagatik Euskaldunara
Maiatzeko finalak
Kontuak holan, maiatzean zehar ezagutuko doguz eskualdeetako txapeldunak zeintzuk diran. Hemen dozue egutegia:
Busturialdea: maiatzaren 8an, Gernikako Elai-Alai aretoan, 17:00etan. Bertsolariak: Amaia Jauregizar, Amaia Uribe, Onintza Enbeita, Ander Elortegi, Anertz Muniategi, Iker Belaustegi, Xabier Enbeita eta Jon Rementeria.
Enkarterri: maiatzaren 15ean, Muskizko Kultur Etxean, 19:00etan.
Arratia: maiatzaren 16an, Zeanuriko Kultur Etxean, 18:30etan.
Bilboaldea: maiatzaren 21ean, Basauriko Ibaigane Kultur Aretoan, 19:30etan.
Ipar Uribe: maiatzaren 22an, Getxoko Andres Isasi musika eskolan, 19:00etan.
Durangaldea: maiatzaren 29an, Iurretako frontoian, 17:00etan.
Maiatzaren hondarretan jakingo dogu zeintzuk kantauko daben udagoienean Bizkaiko Txapelketan. Hogeitamar bertsolari izango doguz lehian orduan. Zuzenean sailkatuta dagoz aurreko urteetan finalista izandakoak: Igor Elortza txapeldunaz gan, Unai Iturriaga, Fredi Paya, Iratxe Ibarra, Etxahun Lekue, Igor Muniategi, Beñat Gaztelurrutia, Oihane Enbeita, Juanjo Respaldiza, Arkaitz Estiballes eta Arkaitz Ugartetxea. Honeeri batuko jakez zazpi eskualdeetako txapeldunak eta ganerakoak puntuazinoaren arabera, zerrendea osotu arte. Martxan dago trena eta Euskaldunako txapelera bitarteko bidea polita izango dalako esperantzaz hartu dogu.
Iñaki Aurrekoetxea
Martxan da 2004ko Bizkaiko Bertsolari Txapelketa. Gizaburuagan abiatu da Lea-Artibaiko trena, eta Bizkaiko gainerako txokoetatik helduko diran trenakaz bat egin ostean, abenduan Euskaldunarako azken tranbia hartuko dabenek jokatu dabe txapela. Bidea egiteko 70 bidaiari prest, kantu eta kontu milaka belarri asetu asmoz.
Bi urterik behin jokatzen da Bizkaiko Txapelketa. 2000koan lehenagoko Eskualdeetako Txapelketak berreskuratu ziran eta ordutik udabarrian jokatzen diran txapelketa honeek emoten deutsie hasikerea udagoienean jokatuko dan Bizkaiko Txapelketari. Txapelketearen helburu nagusiak bertsozaletasuna sustatzea eta bertsolarien promozinoa egitea da, eta horretarako Bizkaiko lurralde osoa hartuko dabe aurreikusitako hamasei saioek. 2002an 65 bertsolarik hartu eben parte, eta aurton 70 izango dira, 1987tik hona Bizkaiko Bertsozale Elkarteak antolatutako txapelketetan ezagutu dan goranzko jokereari eutsita. Bizkaiko lurralde osoa hartuko dala aitatu dogu. Izan be, Bizkaiko zazpi eskualde naturaletan jokatuko dira Eskualdeetako Txapelketak: Arratia, Bilboaldea, Bustuarialdea, Durangaldea, Enkarterri, Lea-Artibai eta Ipar Uribe. Enkarterrikoa lehenengoz jokatuko da, eskualde horretan be bertsozaletasuna zabaltzeko bidean pausu barria emonaz.
Lea-Artibaiko txapela Gorka Ostolazaren burura
Lea-Artibaikoak emon deutso hasikerea maiatzeko txapelen loraldiari, eta maiatzaren 2an Gizaburuagan jokatutako saioan Gorka Ostolazak jantzi eban txapela. Kantulagun izan ebazan beste sei bertsolari: Joseba Artza, Aitor Goti, Oier Azula, Lander Ibarluzea, Lander San Martin eta Erramun Muniozguren. Honenbestez, Ostolaza jn.a udagoienean jokatuko dan Bizkaiko Txapelketarako sailkatu da zuzenean eta ganerakoek beste eskualdeetako saioak jokatu arte zain egon beharko dabe, puntuazinoaren arabera sailkatuko diran jakiteko.
Eskualde batzutan partehartzaile kopurua kontuan hartuta sailkapen saioak egingo dira finalaren aurretik; Ipar Uribe, Bilboakldea eta Durangaldearen kasua da. Aitatzekoa da eremu ez euskaldunetan izango dala partehartzaile kopuru handiena. Ipar Uriben 14 dira balienteak eta maiatzaren 7an eta 14an Gatikan eta Lezaman erabagiko da zeintzuk jokatuko daben eskualdeko finala. Bilboaldean 12 bertsolarik kantauko dabe beste bi sailkapen saiotan, maiatzaren 7an eta 16an Otxarkoagan eta Deustun. Durangaldeko 10 bertsolariek be sailkapen saioak izango dabez maiatzaren 7an eta 15ean, Mallabian eta Durangon. Bustuarialdean zortzi bertsolarik emon dabe izena, Arratian zazpik, eta honeetan saio bakarrean erabagiko da eskualdeko txapela.