Memoria historikoa berreskuratzeko hainbat ekitaldi, Markina-Xemeinen

| Ikusi handiago | Argazki originala

Markina-Xemeingo Garaian alkarteak memoria historikoaren ganeko ekitaldiak antolatu ditu abenduaren 17an, besteak beste, Garaian aldizkariaren zenbakiaren aurkezpena. Horrezaz gan, musika emonaldia eta erakusketea atondu ditue. Aldizkariak Markina-Xemeingo historiari, etnografiari edo soziologiari buruzko artikuluak, alkarrizketak eta argazkiak argitaratzen ditu; zenbaki barrian, 1936ko gerrea da gai nagusia, besteak beste, kontakizunak, agiriak, alkarrizketak eta makina bat argazki batu ditue.

Garaianen aurkezpenaren ostean, 20:00ean, Karmengo eleizan musika eta olerki emonaldi berezia egingo dabe, Gerra Zibila, jendea da hila izenburupean, gerran hildako markinar eta xemeindarren omenez. Pablo Fernandez Arrieta musikariak kontzerturako beren-beregi sortutako lana estreinauko da; ondoren, Patxi Juaristi EHUko irakasleak idatzitako poemak irakurriko ditue.

Abenduaren 30ean, ganera, Ilunpetik argira. Gerra zibila irudietan Markinako kartzelan erakusketea zabalduko dabe Markina-Xemeingo kartzelea izan zan lekuan (Epaitegia, Arretxinaga etorbidean), hain zuzen be. Garaian alkartekoek bisita gidatuak antolatu ditue: abenduak 30ean eta urtarrilak 3an, 17:00etan; eta, urtarrilak 7an eta 8an, 12:00etan.

Gernikan be badabilz memoria historikoaren ganean beharrean. 1937ko bonbardeketearen 75. urteurrena izango da 2012an; hori dala eta, urtemugako ekitaldiak prestatzeko batzarrerako deialdia egin dau Gernika Batzordeak. Hitzordua, hilaren 17an da, 10:00etan, Gernika-Lumoko kultur etxean. Antolatzaileek azaldu dabenez, herri erakundeak, ikertzaileak, idazleak, kultur taldeak, bertsolariak, jantzariak eta ekarpenak egiteko asmoa dauen edonor joan daiteke.