Madres e hijas

- Jatorrizko izenburua: Mother and child
- Zuzendaria eta gidoigilea: Rodrigo García
- Antzezleak: Naomi Watts, Annette Bening, Kerry Washington, Jimmy Smits, Samuel L. Jackson, Cherry Jones, David Morse
- Produktoreak: Lisa Falcone eta Julie Lynn
- Generoa: Drama.
- Iraupena: 125 minutu.
- Herrialdea: AEB/Espainia

'Cosas que diría con sólo mirarla' (2000) eta 'Nueve vidas' (2005) filmek agirian itxi eben Rodrigo Garciaren abilezia gizakien barruko sentimenduak erakusteko orduan. Orain, 'Mother and child' honetan baieztatu geinke: Garcia Marquezen semeari sormenaren maisutasuna atzemoten jako zanetan. Ha eta guztiz be, Estadu Batuetan kokatuta dagoan zuzendari honek egiten dauena ez da bape erraza: oso ondo idatzita dagozan eszena bakan batzuekaz pertsonaia bakotxaren pertsonalidadea primeran deskribiduten dau, hareen kontraesan, bazter eta sakontasun guztiakaz.

Eta Rodrigo Garciak asmetan dituan pertsonaiak ez dira bape planoak. Guztiz kontrakoa. Esan ohi da emakumeen azalean sartzen dala beste inor baino hobeto, eta egia da. Baina bere pelikulak ez dira manikeoak. Pertsonaia nagusiak emakumeak dira, bai, baina gizonak, nahiz eta bigarren planoetan agertu, oso interesgarriak dira eta, askotan, oreka emoten deutsee sufriduten daben emakume horreei.

Pelikula honetan, Annette Benningen pertsonaia da gehien hunkitu nauena. Zakarra eta gogorra kanpotik, bere minari aurrez aurrez begiratzen deutsonean baino ez da hasiko biziten, hasiko da bere buruari baimena emoten zoriontsu izateko. Benning, gainera, primeran dago hainbeste sufriduten dauen emakume horri bizitza emoten. Egia esan, aktore guztiak dagoz ondo, nahiz eta, pertsonaia batzuk sobran egon, adibidez, neskato itsuarena. Beste aldetik, Naomi Wattsek egiten dauen pertsonaiak badauka neurriz kanpoko zeozer; ez da oso ondo ulertzen zergaitik amaitzen dauen era horretan bere bikote barriagaz, nahiz eta jakina izan ez dauela konpromisorik nahi gizon bategaz.

Dana dala, eta kontu edo zehaztasun horreek alboan itxita, txalotzekoak dira film honen zeinbait eszena. Alkarrizketa batzuk bikainak dira, umore kutsu argia agiri da pasarte askotan eta, danetara, amatasunaren desioa eta amatasunak dakarzan lotura basatiak erakusten dituan pelikularik onenetarikoa da.

Ikusi argazki guztiak handiago